«Жалын» сауықтыру орталығы жұмысымен танысты

Кенттегі «Жалын» сауықтыру орталығы 1988 жылдан бері аудан балаларының жазғы демалыс уақытын тиімді өткізуге ықпал етіп келеді. Өз кезегінде аталған орталық заман талабына сай күрделі жөндеуді талап етеді. Осы орайда тынығу орталығының базасына облыстық мәслихат депутаттары арнайы келіп, зерделеу, танысу жұмыстарын жүргізді. Облыстық мәслихат депутаттары Жанкелді Ысқақ, Әмірбек Шаймағанбетов, Мақсұт Нәлібаев, Гүлшат Мұсаева, Аида Абибуллаева, Бауыржан Сандыбаев, Садық Мұстафа, Ержан Ескендір, Жұмабек Ембергенов және облыстық білім басқармасы басшысы орынбасары Бекжан Есенбаев «Жалын» сауықтыру орталығының бүгінгі жай-күйімен танысты.

Облыстық мәслихат депутаттарымен бірге аудандық мәслихат төрағасы Ержан Әжікенов, аудан әкімінің орынбасары Димаш Байдушев, аудандық білім бөлімінің басшысы Еркебұлан Жақып балалардың тынығу сапасына ден қойды.

«Жалын» сауықтыру орталығының директоры Әділбек Бәйменов күрделі жөн­деу жұмыстарының жобасымен таныстырып өтті.

– Сауықтыру орталығымыз бір жаз­ғы демалыста 691 оқушының демалып, тынығып, жазғы демалыс уақытын тиім­ді өткізуіне мүмкіндік жасайды. Яғни маусым айынан бас­тап 6 ауысым өтеді. Әр ауысымда 110-120 бала тынығады. Тоғыз топқа бөлінетін балаларға 1 аға тәлімгер мен 9 тәрбиеші бекітіледі. Бала­­лардың уақытын тиімді өткізу, олардың денсаулығы, санитарлық таза­лық – барлығы назардан тыс қалған емес. Жаңа маусым басталмас бұрын ор­­талықта көркейту-көгалдандыру, жөн­­­­­деу жұмыстары жүргізілді. Тыны­ғу­­­­­шыларға тиімді ету мақсатында сауық­тыру орталығына заман талабына сай күрделі жөндеу жұмыстарын жүргізу қажет, – деді Ә.Рақымжанұлы.

Облыстық мәслихат депутаттары өз кезегінде лагерь аумағын аралап, балалардың демалуына арналған нысандардың жай-күйін, қауіпсіздік талаптарының сақталуын және сани­тарлық жағдайын көрді. Жылжымалы кітапхана, медициналық пункт, балалар демалатын үйлер мен асхана жұмысымен танысты. Сонымен қатар жауапты мамандармен пікірлесіп, тал­қылады.

Айта кетейік, облыстық мәслихат депутаттары алдағы уақытта «Жалын» сауықтыру орталығының базасын нығайтып, аяқсу мәселесін шешуді, балаларға арналған бассейн орнатып, су құбырларын жөндеу қажеттігін айтты.

– Жалпы алғанда «Жалын» са­уықтыру орталығының жұмысы жү­йелі. Балалар тынығатын үйлер, меди­циналық пункт барлығы өте жақсы жұмыс жасап тұр. Таза, әдемі, сапалы. Тек алдағы уақытта аяқсу мәселесін қалыпқа келтіру керек. Сонда ағаштар жай­қалып, тынығушыларға да сая, көлеңке болады. Және мынадай ыстық күнде балалар үшін шомылу – нағыз демалыс болмақ. Сондықтан сауықтыру орталығына бассейн салу жұмысын қолға алу қажет. Жоспарлы жұмыстар кезең-кезеңімен жүргізілуі орынды, – деді халық қалаулылары.

А.МҰХАНБЕТҚАЛИ