Аудандық басылымның бұрынғы бас редакторы, қаламгер Абызбай әке мен Гүлжан ананың перзенті Ләззат Иманғалиева тазалықты, тиянақтылықты жаны сүйеді. Ардақ­ты ананың алғашқыда мем­лекеттік қызметке келемін деген ойы болмаған. Көпбалалы отбасынан шыққан Ләззат Абызбайқызының негізгі мамандығы – орыс тілі және әдебиеті пәнінің мұ­ғалімі еді. №36 А.Жданов атындағы орта мектепте оқып жүріп, Қызылорда қаласындағы Н.Гоголь атындағы пединституттың студенті атануды мақсат тұтты. Педагогикалық білі­мімен бір жылдары қос білім ошағында халық баласына тағы­лымды тәрбие берді. Кейіннен, Шаған ауылдық Кеңесі атқару коми­тетінің хатшысы қызметіне қабыл­данып, жергілікті халықтың игілігі жолында аянбай жұмыс жасауға бай­лам жасады.

– Мұғалім болу бір басқа, мемлекеттік қызмет саласында жұмыс жасау – мүлдем бөлек әң­гіме. Мектепте балаларға саба­ғыңды беріп, тәрбиесіне көңіл бөліп, ісқағазды реттеу жүк­теледі. Ал ауыл әкімшілігінде сан салаға қатысты құжат айналы­мын ыждағаттылықпен орын­дап, алды­ңа келген әрбір адамның мәселесін шешуге тырысамыз. Мем­лекет­тік қызметші барлық әре­кетін қол­даныстағы заңдар мен нор­мативтік актілерге сәйкес орындауы керек. Қызмет барысында да, қызметтен тыс уақытта да адам­дар­ға жоғары мәдениет пен сыпайылық таныту – басты міндетіміз. Жылдар бойы жинақтаған тәжірибенің арқасында кез келген жұмыста ең алдымен маман тарапынан жауапкершілік алдыңғы орында тұру керектігін жақсы білемін. 30 жыл бойы мем­лекеттік қызметте жүр­генімде көптеген қиындықты еңсере білдік, – дейді өз ісінің білгірі.

Шаған ауылы – Тереңөзек кентінен кейінгі халық саны көп елді мекен. Міне, берекесі тасыған, қамбасы астыққа толған ауылда Ләззат Абызбайқызының қол­таңбасы айқын қалды. Бас маман бола жүріп, сан түрлі қызметті үйлестіре білгеніне тәнтіміз. Функцио­налдық міндетіне сәйкес, кейіпкеріміз ауыл шаруашылығы кітап­тарын сауатты орындап, есеп-қисапты тізбектеген. Ауылдағы барлық сала бойынша көрсеткішті жинақтап, таразылап, зерделеп, кем­шілікті жойып, аудандық статистика бөліміне есеп тапсырып отырған. АХАТ бөлімімен байланыс орнатып, жаңа туған сәбиге, өмірден өткен кісіге, отау құрған ерлі-зайыптыға өтініші бойынша куәлік дайындайтын. АХАТ қызметіндегі АКТ толтырып, жұмысты ұтымды үйлестіреді. Ауылға көшіп келген және көшіп кеткен жандарды есепке кіргізіп, мәліметін дайын­дайды. Көптеген мемлекеттік бағ­дарлама шеңберінде атқарыл­ған жұмыс барысы жөнінде аудан әкімдігіне арнайы есептік баяндама дайындайды. Жұмыссыздық пен әлеуметтік саланың жай-күйін зерттеп, бұл қызметтің де қыр-сырына қаныға түседі. Ләззат апа ауыл әкім­шілігінде жұмыс атқарған жылдарында нотариаттық іс-әрекеттер бағытындағы құжатты аса мұқият орындайды. Сенімхат, қолхат секіл­ді көптеген құжаттың сауатты жазылуына айрықша көңіл бөледі.

– Барлық ауылдың бас маманына функционалдық міндет бірдей бөлінеді. Дегенмен, жұмыстың ау­қым­­­­­дылығы халық санының көп­тігіне байланысты жергілікті халықтың жағдайын саралай отырып, сапалы қызмет етуге мән береміз. Ауыл шаруашылығы мен әлеуметтік саланың өзі күрделі бол­уы­мен ерекшеленеді. Отыз жасымда әкім­шілік жұмысына араласып, зейнет демалысына шыққанға дейін 13 әкім­нің қарамағында болдым. Өзім үлгі тұтатын ел азаматтары Өмірзақ Сәдуов, Абдолла Атақаев, Ұмытпас Байдәулетов әкімдік қызметте білік­тілігімен, іскерлігімен, жан-жақты ұйым­дастырушылығымен таныла білді. Жұмысқа қабылданған кезімде ауданды Алмагүл Божанова апайымыз басқаратын еді. Біздің кезімізде марапат түрлері аз болатын. Дегенмен, маманға ескерту беру, сөгіс жариялау жиі кездеседі. Осы мемлекеттік қызмет саласындағы жұмысымды тиянақты орындағанымнан болар, басшылықтан бірде-бір ес­керту алмадым, – дейді Ләззат Абызбайқызы.

Біздің Ләззат апай жұмыста білік­тілігі жоғары маман болғанымен, отбасында ер азаматына аяулы жар. Су шаруашылығы саласында қажыр­лы еңбегімен танылған Алмас Ердәулетовпен отау құрған ардақты жан ері мен баланың бабын таба білген. Олардың 4 перзенті жоғарғы оқу орнын бітіріп, ел игілігі жолында мамандықтары бойынша жұмыс жасауда. Биыл 65 жасты еңсерген Ләззат Абызбайқызы 46 жылдан бері арқасүйер азаматының қас-қабағына қарайлап, отбасындағы татулық діңгегін сақтап келеді. 13 немереге өнегелі тәрбие беріп, үлкен азамат болып өсуіне зор ықпал етуде. Үйдегі отағасы Алмас Ізетұлы – жоғары білімді инженер-гидротехник.

– Ләззат Абызбайқызымен бірге қызмет істеген жылдары өте сауатты, білімді екенін аңғаратынмын. Ауыл әкімі қызметіне келгенімде бас маманның атқаратын жұ­мы­­сының көптігіне таңқалдым. Бірнеше жүктемесін басқа да маман­дарға тапсырып, оған негізгі мәселелермен айналысуға тапсырма бердім. Осылайша, тең дәре­жедегі қызметтік бөлініс жасалды. Күнделікті жергілікті халықтың арыз-шағымын тыңдайтын кезде Ләззат жанымнан табылады. Әрбір тұр­ғынның жағдайын бағдарлап, өзіме жеткізіп отырады. Мәселені бір­лесіп шешкен уақытында өз ісіне берілген мықты маманның іскерлігі әп-сәтте байқалады. Бойында тек­тілігі басым әріптесімнің еңбегін жоғары бағалаймын, – дейді мем­лекеттік қызмет саласының ардагері Ұмытпас Байдәулетов.

Ләззат Иманғалиева әр жылдары жоғары марапаттарға қол жеткізген. Ең бастысы, сала арда­гері негізгі марапат халықтың алғысы екенін алға тартады.