Елеулі еңбекпен – зейнетке
Еңбек адамы әрқашанда елге сыйлы. Биылғы жылды Мемлекет басшысы «Жұмысшы мамандық жылы» деп жариялады. Бұл – бүкіл еңбек адамына, жұмысшы мамандарға деген құрмет. Осы орайда «Руханият орталығының» Ахат бөлімінде зейнет жасына жетіп, қызметін абыроймен атқарған еңбек адамдары Күлжан Қалыбай, Зейнелғабдин Батталұлы және Гүлсары Мырхықызына салтанатты түрде зейнеткер куәлігі табысталды.Еңбек жолындағы елеулі қызметінің жемісін көру әрбір аға буынның арманы. Зейнет жасына келу – бұл тек еңбек жолының аяқталуы ғана емес, сонымен қатар өмірлік тәжірибені кейінгі ұрпаққа жеткізудің жаңа бір кезеңі іспеттес.
Бүгінде өз ісінің майталманы, жергілікті баспасөзді дер кезінде оқырманға жеткізуде аянбай еңбек етіп келген таратушылардың бірі – Күлжан Қалыбай. Бұл есім Нағи Ілиясов ауылының тұрғындарына етене таныс. Әр ісіне тиянақты маман редакция мен оқырман арасындағы жауапкершілігін міндетті түрде бірінші орынға қояды. Туған жеріне қызмет етіп келе жатқан ардақты жанның тасымалдаушы қызметін атқарып жүргеніне биыл 10 жылға таяды. Бақытын қарапайым жұмыстан тапқан еңбек адамы биыл зейнет жасына жетіп, зейнеткер куәлігіне ие болып отыр. Салтанатты түрде куәлікті жауапты бөлімнің басшысы Салтанат Бекжүнісова табыстады. Зейнеткерді «Тіршілік тынысы» газетінің бас редакторы Аружан Мұханбетқали мен ұжымдастары құттықтап, құрмет көрсетті.
Сондай-ақ, Сырдария ауданы әкімі аппараты коммуналдық мемлекеттік мекемесінде қызметтік орынжайды тазалаушы болып еңбек еткен Гүлсары Мырхықызы мен аталған мекеменің қарауыл қызметін атқарған Зейнелғабдин Батталұлына да зейнеткер куәлігі берілді.
Ахат бөлімінің басшысы Салтанат Бекжүнісова зейнеткерлерді зейнет жасымен құттықтап, алдағы уақытқа сәттілік тіледі. Еңбек адамдарын ұжым қызметкерлері құттықтап сый-сыяпат табыстады.
Гүлсезім ЖАНСЕРІКҚЫЗЫ
