Газет таратушылардың еңбегін бағалауымыз қажет

Еңбек – бұл әрбір адамның екінші анасы. Мемлекет басшысы Қасым-Жомарт Тоқаев биылғы жылды «Жұмысшы мамандықтар» жылы деп жариялауы бекер емес. Әрбір мамандықтың өзіндік қиындығы мен қызығы қатар жүреді. Бұл еңбек адамына деген құрмет. «Адамның адамгершілігі еңбекті бағалауда» деп ел Президенті айтқан болатын.

«Адал азамат – иманды», «Адал еңбек – бәрін жеңбек», «Адал табыс – несібе» демекші, адал еңбек етіп жүргендердің қатарында хат тасушыларды, яғни газет таратушылардың еңбегін ерекше атап өтер едім. Республикалық, облыстық, аудандық газеттерді күтіп алып, оны әр мекемеге, әрбір тұрғынның үйіне ауа-рай­ы­­на қарамастан уақытылы жеткізіп тұрады. Қатты сықырлаған аязда, шы­жыған ыстықта, жауын-шашын, боранда, лайсаң көшеде жүріп жұмысын адал атқарады. Көшеде таратушы болып еңбек ететіндер кейде тіпті оқыс оқиғаға тап болып жатады. Қаңғыбас ит қаншама көшеде жүретін, міне сондай қауіпке қарамастан таратушылар ең­бектеріне адал.

Мен жаңа қоныс ай­мағында тұ­­р­а­­­­­­­мын. Кенттегі «Әйтек» каналы мен Сыр­да­рия өзенінің аралығы әсем көз тарта­тын тұрғын үйлерге толды. Кісі қызығар­лық небір керемет үйлер кенттің ажарын келтіруде. Бірақ, «әттеген-айы» осы жаңа үйлерге көше атаулары берілсе де, көшенің бойындағы үйлерге оның атауы мен нөмірлері әлі күнге дейін жазылып, қойылмаған. Газет таратушылар әр үйдің есігіне бормен нөмірін жазып, газет-журналдарды терезе, есікке қыстырып іліп кетіп жүр. Апарған газет кейде үй иелеріне жетпей жатады. Себебі пошта жәшігіне салынбаған газет желмен ұшып, батпаққа түсіп лас болып қалады. Сондықтан әрбір тұрғынға пошта жәшігін жасап қою қажеттігін айтқым келеді. Сонымен қатар сырттан келген қонақтар іздеген үйін табу үшін әр үйдің есігін қағып, көше атауын, нөмірін сұрап әлекке түсуде. Бұл жұртты да, үй егесін де әбіржітуде. Алдағы уақытта жұмысшы мамандыққа деген құрметіміз ретінде әрбір үй егесі дарбазасына пошта жәшігін ыңғайлап іліп қойса және кент әкімдігі тұрғын үйлерге көше атауы мен нөмірін жазса деген тілегім бар.

Сұлупан ШАМШАДИНОВА,

ардагер-ұстаз
Фото: Ашық дереккөзден