Тазалық – иманның жартысы. Діні­міз­де тазалыққа аса көңіл бөлінеді. Оның маңыздылығы жан-жақты айты­лады. Асылында, адамзаттың ішкі жан дүниесі қаншалықты таза бол­са, сыртқы тазалық та соншалық көрі­ніс береді. Сондықтан әркім жауап­кершілік танытып, айналасын таза ұстау­ға дағдыланса, қоршаған орта да әсем­дікке бөленеді.

Күн сайын күйбең тірлікте адам онша мән бере бермейтін жағдайлар болып жатады. Айналамыздағы тірші­ліктегі тазалық сақтау, көркейту мен көгалдандыру сондай көріністің бірі. Кенттің ажары мен сәулеті –тұр­мыс-тіршілігіміздің тынысы, көр­кі. Осы жұмыстың басы-қасында жүретін­дердің адал еңбегінің арқасында кентіміз күн сайын ажарланып келеді. Қарапайым еңбек адамының өлшеусіз еңбегінің арқасында тұрғын­дар күнделікті таза көшенің бойымен жұмысқа барып келетіні арнайы мекемеде жасақталған бір топ тазалықшылардың арқасы. Көше сыпырушылар елден бұрын ерте тұрып көше тазалығымен айна­лысады. Әсіресе жаздыгүні күн ысымай бүкшеңдеп қоқыс теріп жүрсе, күннің суығында да бұл жұмыс тоқтаған емес. Көше тазалығымен айна­лысатын жұмысшылар қара жұмыс иесі болғанымен, атқарып отырған жұмысы ұшан-теңіз. Бұл жұмыспен қоғамдық жұмысқа тартыл­ған қарапайым жұмысшылар да айналысады. Сонымен қатар кент әкімдігіне қарасты «Тереңөзек таза­лығы» мекемесіндегі жұмысшылар кент аумағын түгелдей сыпырып, қоқыс­тан арылтады.

Кент тұрғыны Гүлмира Оспанова көше тазалығына атсалысып жүрге­ніне тоғыз жылдай уақыт болды. Қара­пайым еңбек адамының маңдай терімен тапқан нәпақасы кенттің гүлденуімен байланысты. Көркейту-көгалдандыру жұмысы маусымдық болғанымен, көше тазалығымен жыл он екі ай айналысатын мекемеде еңбек ететін Гүлмира адал еңбегінің арқа­сында әріптестері мен басшылық тарапынан құрметке бөленген.

– Көктем, жаз айларында алаңға, саябаққа гүл егіп, күнделікті оны суға­ру жұмыстарын атқарамыз. Бұдан басқа жылдың төрт мезгілінде таң атқаннан көше тазалығына атсалысамыз. Күні бойы атқарылатын жұмысымызға кент тұрғындары да атсалысса дей­міз. Қоқыстарын кез келген жерге тастамай, белгіленген қоқыс жәшігіне апаруға дағдыланса. Кейде мейрам күндері көше мен саябақта, орталық алаң мен стадионда босаған судың құтысы мен целофаннан аяқ алып жүре алмайсыз. Жұмысшылар ерік­кен­нің ермегін атқарып жүрген жоқ. Кентіміздің көркеюіне, таза­лығына атсалысып жүр. Жаз айы бол­ғандықтан, гүлзарларды арам шөптен тазарту, гүл суару секілді жұмысты да бірігіп атқарамыз, – дейді жұмысшы Гүлмира Оспанова.

Көше тазалығымен айналысып жүрген Гүлмира – екі баланың анасы. Бұл күні балалары студент, болашақ мамандар. Жұмысына білек сыбана кірісіп, тиянақты атқаруға дағ­дыланған еңбеккеш ана күнделікті әдетімен таң атқаннан жұмысына кірісіп, кешқұрым аяқтайды. Оның епті де ширақ қимылы көпке үлгі.

Иә, тазалық – ортақ іс. Дегенмен кейбір кент тұрғындары оны біреуге артып қойғанды жөн көреді. Әркім өз ауласын, есігінің алдын, көшесін тазалап отырса, кентіміз де көркейе түседі. Бұл – Гүлмира мен оның әріп­тестерінің ортақ пікірі. «Сырт көз – сыншы» дегендей, кентімізге келген қонақтың оң пікірі көше тазалығымен айналысып жүрген Гүлмира секілді еңбек адамының жұмысына берілген баға. Сондықтан әрбір тұрғын, мейлі ол жас болсын, кәрі болсын ортақ үйіміз – кенттің тазалығына атсалысайық!