Жемқорлықсыз қоғам – жарқын келешек
Сыбайлас жемқорлық – қоғам дерті. Онымен күресу – баршаға ортақ міндет. Сырдария аудандық қазынашылық басқармасында сыбайлас жемқорлық сипатындағы бұзушылықтарды болдырмау және оның алдын алу жолдары тақырыбына арналған ерекше форматтағы дөңгелек үстел өтті. Жиынға басқарма басшысы Зағира Рахымшаева, аудандық полиция бөлімінің капитаны Әйгерім Қоштаева, аудандық газеттің бас редакторы және сала мамандары арнайы қатысты. Сырдария аудандық қазынашылық басқармасының басшысы жоспарлы жұмыс туралы айтып өтті.– Бізде Қазақстан Республикасы Қаржы министрлігі Қазынашылық комитетінің Қызылорда облысы бойынша Қазынашылық департаментінің сыбайлас жемқорлыққа қарсы іс-қимыл жөніндегі 2025 жылға арналған іс-шара жоспарына сәйкес сыбайлас жемқорлық сипатындағы бұзушылықтарды болдырмау және оның алдын алу жолдары тақырыбына дөңгелек үстелдер, ақпараттық оқулар ұйымдастырылып отырады. Сыбайлас жемқорлық пен пара берудің үлкен қылмыс екені белгілі. Оның алдын алу, күресу – күн тәртібіндегі негізгі мәселе, – деді З.Байқоңырқызы.
Сондай-ақ құқық қорғау саласының өкілі, полиция капитаны Әйгерім Қоштаева аудан көлемінде сыбайлас жемқорлыққа қатысты орын алған бұзушылықтар бойынша айтып өтті.
– Мемлекет басшысы Қасым-Жомарт Кемелұлы Тоқаев сыбайлас жемқорлық мәселесіне үлкен мән беріп, ұдайы назарда ұстауда. Пара алу да, пара беру де қылмыс болып саналады. Ондай іске барған тұлғаға Қазақстан Республикасының қылмыстық кодексі бойынша арнайы шаралар көріледі. Аталған мәселе бойынша аудан көлемінде қазіргі таңда ешқандай іс қозғалып жатқан жоқ, – деді Ә.Қоштаева.
Одан кейін Сырдария аудандық қазынашылық басқармасының бас маман-бас қазынашысы Ғалия Балжанова баяндама жасады. Сала маманы сыбайлас жемқорлық түсінігі мен оның тарихи тамыры туралы тың деректерге тоқталып өтті. Бір қызығы, жемқорлық туралы сонау ғасырларда, тіпті Вавилон мұрағаттарында, заңдарында кездеседі екен. Қазақ даласында да сыбайлас жемқорлықты болдырмау мақсатында Қазақ хандығының кезінде өз заңдары болған. «Қасым ханның қасқа жолы», «Есім ханның ескі жолы», «Тәуке ханның Жеті жарғысы», міне, осындай хандық құжаттамаларында да қылмыстық істер туралы сөз қозғалған. Өзге де тың деректерге өз баяндамасында тоқталып өткен сала маманы дөңгелек үстелге қатысушылармен бірге бірнеше танымдық ойын ұйымдастырды.
Дөңгелек үстелді басқарма басшысы қорытындылап, саланың жұмысы туралы айтып өтті. Сондай-ақ арнайы қатысқан қонақтарға ризашылығын білдірді. Айта кетейік, биыл Қазақстан Республикасы Қаржы министрлігінің Қызылорда облыстық басқармасының құрылғанына 30 жыл толып отыр.
А.МҰХАНБЕТҚАЛИ
