Облыстық байқаудан олжалы оралды
Құқық қорғау органдарында қызмет ететін тәртіп сақшылары арасында «Парасатты полицей» байқауы дәстүрлі түрде жыл сайын өткізіліп келеді. Бұл жолы Сырдария аудандық полиция бөлімінің «Сыр сақшылары» тобы облыстық байқауда топ жарып, І орын иеленді.Байқау бірнеше кезеңнен тұрды. Бірінші кезеңде қатысушылар өзін таныстырса, кейінгі кезеңдерде өз өнерлерін көрсетіп, сахналық қойылым қойды. Сондай-ақ кәсіби дағдыларын паш ететін арнайы видеоролик әзірлеп, ел дамуындағы полиция қызметкерлерінің орны мен үлесін көрсетті.
Облыстық байқаудың қорытындысы бойынша Сырдария аудандық полиция бөлімінің «Сыр сақшылары» командасы жүзден жүйрік шығып, жеңімпаз атанды. Екінші орын Жалағаш аудандық полиция бөлімінің «Алмағанбетов арландары» командасына бұйырды. Ал Қазалы аудандық полиция бөлімінің «Жалын» командасы жүлделі үшінші орын тұғырынан көрiндi.
– Әділетті Қазақстанды құру үшін әрбір қызметшінің отаншыл, адал болуы және өз ісіне жауапкершілікпен қарауы өте маңызды. Президент заңсыздық, тәртіпсіздік, мәдениетсіздік елді жарға жығатынын айтқан болатын. Біз қылмыспен күреске бүкіл қоғам болып қарсы тұруымыз керек. Ал тәртіпке бағынған қоғам өркениетті болады. Бұл – заңдылық. Әр азамат еліміздің заңын құрметтесе, береке-бірлік те, бақуатты тұрмыс та болады. Осы ретте полицейлер жан-жақты болуы керек. Сондықтан «Парасатты полицей» байқауына қатысу, жоғары деңгейде өнер көрсету зор жауапкершілік жүктейді. Жүлделі бірінші орынды қанжығамызға байлап, Сырдария ауданының абыройын асқақтатқанымызға ризамыз, – дейді аудандық полиция бөлімі бастығының кадр саясаты жөніндегі орынбасары, полиция подполковнигі Асхат Төлеуов.
Айта кету керек, бұл байқауда аудан намысын Қ.Еспанов, Н.Ғаниұлы, А.Әмірбек, Н.Кеукенов, Н.Жұмабек қорғады. Сондай-ақ байқаудың қазылар алқасы ерекше өнер көрсеткен қатысушыларды марапаттады. «Ұйымшыл команда» номинациясын Қармақшы аудандық полиция бөлімінің «Қорқыт қырандары» командасы жеңіп алса, «Үздік сахналық көрініс» номинациясын Қызылорда қалалық полиция басқармасының «Айбар» командасы иеленді. Ал Шиелі аудандық полиция бөлімінің «Міндет. Абырой. Ерлік» командасы мемлекеттік тілдің мерей-мәртебесін арттырған команда ретінде жақсы қырынан танылды. «Өнерлі команда» номинациясы Жаңақорған аудандық полиция бөлімінің «Аманат тобы» командасына және «Көрермен көзайымы» номинациясын Арал аудандық полиция бөлімінің «Теңіз тамшылары» командасына берілді. Жеңімпаз командаларға Алғыс хаттар мен кубоктар табысталды.
А.ИБРАГИМҰЛЫ
