Мемлекет басшысы еліміздің әрбір өңі­рін дамыту үшін инвестиция тартуды тапсырды. Қасым-Жомарт Тоқаев экономика мен еңбек нарығының қозғаушы күшіне айналуға тиісті шағын және орта кәсіпті қорғау мәселелерін әркез назарға алып, нақты міндеттер жүктеуде. Осы ретте аймақ басшысы бұл бағытта нақты нәтиже көрсетуге байланысты жаппай кәсіпкерлікті дамытып, инвестиция тартудың экономиканы нығайтатын басым бағыт екенін айтып, аудан әкімдеріне нақты тапсырма берді. Осыған байланыс­ты аудан көлемінде атқарылып жатқан жұмыстар ауқымды. Атап айтар болсақ, жыл басынан бері 106 жоба қаржылай қол­дау тапқан.

– 2023 жылдың қорытындысымен шағын және орта бизнесте жұмыспен қам­тылғандар саны 4774 адамды құрады. Оның ішінде заңды тұл­ғаларда – 980, жеке кәсіпкерлікте – 1654, шаруа қожалықтарында – 2140 адам. Сонымен қатар, 2023 жылы шағын және орта кәсіпкерлік субъектілерімен 23,8 млрд тең­генің өнімі өндірілді. Жалпы биыл жыл басынан бері Сырдария ауданында мемлекеттік және өңірлік бағдарламалар аясында құны 1,3 млрд теңгені құрайтын 106 жобаға қаржылай қолдау көрсетілді, – дейді аудандық кәсіпкерлік және өнер­кәсіп бөлімінің басшысы Алмат Сәдуақасов.

Елімізде «2021-2025 жылдарға ар­нал­­ған кәсіпкерлікті дамыту жөніндегі Ұлттық жоба» жос­пар бойынша дұрыс жүзеге асып келеді. Атал­­­­­ған құжаттың негізгі міндеттемесі – қаржылай қолдау көрсету. Оның ішінде субсидиялау, кепіл болу, жеңілдікпен микро­­кредиттеу, мемлекеттік гранттар беру қарастырылған. Негізінен шағын елді ­мекендерді дамыту және экономиканы қалыптандыру мақсатында аудан, ауылдық жерлерде кәсіп бастаушыларға толық жағдай жасалуда. Тиісті сала мамандарының тарапынан түсіндірме жұмыстары да жүргізіліп келеді. Осы ретте қазіргі таңда аудан көлемінде жаңа кәсіп түрлері жанданып отыр. Бұл кәсіпкерлермен қатар тұрғындарға да өте тиімді. Себебі күнделікті қажетін іздеген жұрт бұрынғыдай қалаға сабылып жатпайды. Аудан ішінде де сапалы қызметтер қолжетімді. Есесіне аудан экономикасы да алға жылжуда. Атап айтар болсақ, аудан көлемінде ірі қалалардағыдай тамақтану орталықтары, сән салондары жұмысын жақсы жолға қойған. Сондай-ақ түрлі бағыттағы дүкендер мен цехтар да бар. Өзіміздің ауданнан шығып жатқан жеңіл өнер­кәсіп өнімдерін де мақтанышпен айту­ға болады.

Сондай-ақ атаулы бағдарламалар негізінде жеке кәсіпкерлер өз жұ­мы­сын жандандыруда. Мысалы, «Мик­робизнес-Қызылорда» бағдар­ламасы аясында құны 28 млн теңгенің 7 жо­­басы қаржыландырылған. Соны­мен қатар «Бизнестің жол картасы-2025» бағдарламасы бойынша құны 793,8 млн теңгенің 16 жобасы екінші деңгейлі банктер тарапынан қаржыландырылып отыр. «Ұлттық жоба» шеңберінде жаңа бизнес идея­ларды іске асыру мақсатында 1 476 800 теңгеден 40 адамға 59 млн теңге көлемінде мемлекеттік қайтарымсыз грант берілгенін де атап өту орынды. Ал аграрлық несие корпорациясы арқылы «Іскер» бағдарламалары бойын­ша 198,5 млн теңгенің 25 жобасы іске асса, «Кең дала» бағдарламасы бойынша 18 млн теңгенің 3 жобасы қаржылық қолдау тапқан. «ҚазАгроҚаржы» АҚ-ның Қызылорда филиалы арқылы құны 251,6 млн теңгеге 15 ауылшаруашылық техникалары мен құрал-жабдықтары алынғаны да саланың серпімді жұмы­сынан хабар береді.

Шағын және орта кәсіпкерлік саласын дамыту – еліміздің алға қойған басты міндеттерінің бірі. Себебі өзара бәсеке арқылы аймақтар дамыса, екіншіден жұмыссыздықты азайтудың бірден-бір жолы – жеке кәсіпкерлерге қолдау білдіру. Әрі халық сұранысын қамтамасыз етіп, экономиканы қуат­тай түсетіні және бар. Иә, «Еңбек еткен­­ге бақыт басын иеді» дейді халық даналығы. Бұл ретте ауданда атқарылып жатқан жұмыстар тіке­лей аудан әкімінің және сала мамандарының бақылауында екенін айта кету орынды.