Тіршілік тынысы Tirshilik-tynysy.kz ақпараттық агенттігі
» » «Тұран» сыйлығының иегері атанды

«Тұран» сыйлығының иегері атанды

Берекелі Бесарық ауылының тумасы, ақын Елубай Әуезов «Тұран» сыйлығымен марапатталды. Марапатты облыс әкімі Нұрлыбек Нәлібаев мәдениет және өнер күні мерекесіне орай өткізілген салтанатты жиында табыстап, ақынның мерейін өсірді.

Сырдариялық ақын Елубай Әуезов әдеби өл­кеге ерте қадам басты. Ол жалынды жастық кезеңінде-ақ облыстық, республикалық деңгей­дегі жыр мүшәйраларының жеңімпазы атанды. Ауылдан шыққан ақын Бесарыққа келген мәр­тебелі меймандарды өзінің жалынды жырларымен қарсы алып, көпшіліктің көңіл төрінен орын алды деп айтуға толық негіз бар. Көңілді тер­бейтін, жүректі емдейтін лирикалық туындыларымен ақын бүгінде өзіндік оқырманын қалып­­тастырды. Бұған ақынның соңғы жылдары жарық­қа шыққан кітаптарының қолдан-қолға тимей тез тарап, оқырман қауымның оң бағасына ие болғаны дәлел. Сондықтан шығармашыл азамат­қа «Тұран» сыйлығының берілуі оның шығармашылық жолдағы ізденісіне, әдеби орта қалыптастырудағы еңбегіне берілген лайықты баға болды.

– Елубай Жұманұлының жырларында ерекше сарын, тереңдік және мазмұнды идея бар. Ұйқас пен ой қуаламайды, туындысының көлемін ұзар­тамын деп сезімге ерік бермейді. Қысқа-нұсқа жазса да әр сөзді орнымен қолданады. Оның өлеңдерін әсіресе орта буын өкілдері мен жас­тар жақсы оқиды. Соңғы жылдары жазған кітап­тарының сапалы мазмұны бай. Терең ізденіс үстінде жүргені анық аңғарылады. Сондықтан «Тұран» сыйлығына ұсынылып, марапатталып жатқаны өте дұрыс болды. Ақынға шалқар шабыт пен шығармашылық сәттілік тілейміз, – дейді Қазақстан Жазушылар одағының Қызылорда облысындағы өкілі, Сырдария ауданының Құрмет­ті азаматы Қаршыға Есімсейітова.

Айта кету керек, ақын, Қазақстан Жазушылар одағының мүшесі Елубай Әуезов ауданымызға қарасты Бесарық ауылында 1967 жылы дүниеге келген. Қызылордадағы Н.В.Гоголь атындағы педагогикалық институтының түлегі алғашқы еңбек жолын Бесарық ауылындағы №147 мектепте қазақ тілі мен әдебиеті пәнінің мұғалімі болып бастап, облыстағы қос телеарнада он жылға жуық қызмет атқарған. Облыстық «Сыр бойы» газетіне бөлім меңгерушісі, облыстық «Ел тілегі» газетіне бас редакторы болған. Соңғы кезде «ҚазАқпарат» халықаралық ақпараттық агенттігінің Қызылорда облысы бойынша мен­шікті тілшісі қызметін атқарды. Осы уақытқа дейін бірнеше кітабы жарық көрді және «Жыр тұғырым – Тәуелсіздік», «Бесарық бастауы», «Сүйген жүрек», «Сырдың сырлы сандығы» тағы бас­қа да ұжымдық жыр жинақтарына өлеңдері енген.

Ақтөре ИБРАГИМҰЛЫ
25 мамыр 2024 ж. 63 0