Тәтті тоқаштар – Тереңөзекте

Тереңөзек кентінде кәсіп­пен айналысуға ниетті жас­тар қатары жеткілікті. Осы күні «екі қолға бір күрек» таппай жүрген жас­тардың басым бөлігі бизнес әліппесін меңгеруге ынталы. Расында, нарықтық заманға бейімделу өте өзек­ті саналады. Бұл ретте, тереңөзектік жас кәсіп­кер Мадияр Балтабаев мемлекеттік грант иегері атанып, шағын наубайхана ашқан. Бүгінде кәсіп иесі шағын кәсібі арқылы жергілікті халықты нан өнімдерімен қамтамасыз етіп отыр.

Негізінен, Мадияр Балтабаев өткен жылы шағын наубайхана жұмысын қолға алған болатын. Қазір наубайханада 2 адам жұмыспен қамтылған. Күніне 400-500 дана нан пісірілетін наубайхана иесі кәсібін кеңейтуге мүдделі. Себебі, «қолы алтын» мамандардың пісір­ген нанына көпшілік сұранысы жо­ғары. Мәселен, олар бөлке нан, тоқаш, батон, таба нан пісірумен айналысады. Тәтті нан өнімдерін тойға тапсырыс ретінде беретін жандар аз емес. Әрине, сапа бар жерде сұраныс та жоғары болады. Жас кәсіпкер тынымсыз еңбектің арқасында көпшіліктің талғам үде­сінен шығу үшін барын сала бермек.

– Мен отбасында 2 ағайын­дымын. Осыдан 28 жыл бұрын Тереңөзек кентінде дүниеге кел­дім. Уақытында Қызылорда заң колледжінде және «Ақмешіт» инс­титутында экономика саласы бойынша білім алдым. Қаржы бағытын тереңнен игергендіктен, кәсіпті түр­лендіру қиындық соқтырмады. Алдағы уақытта шағын наубайхана жұмысын ұлғайтып, тәтті өнім­дерімізді көпшілікке ұсынғым келе­ді. Бұл ретте, ата-анамның қолда­уы ерекше. Ел-халықтың алғысына бөлену – басты міндетіміз, – дейді жас кәсіпкер.

Өз кезегінде жас кәсіпкер Мадияр Балтабаевтың алдағы жұмысына сәттілік тілейміз!

Балтабай ОРДАБЕКОВ