Жас отбасылардың некесі қиылды

Апта ағымында аудандық мәдениет үйінде «Адал адам» жобасының «Жанұя шуағы» бағыты бойын­ша «Бақытты жас отау» тақырыбында жас отбасылармен кездесу кеші өткізілген болатын. Кешке жыл басынан бері отау құрып, шаңырақ көтерген жас отбасы мүшелері шақырылды.

Тағылымы мол кешті ашқан Сырдария аудандық азаматтық хал актілерін тіркеу бөлімінің директоры Салтанат Бекжүнісова жастарды қуаныштарымен құттықтады.

– Бүгінде жас отау иелерін шаңырақ көтерген мерейлі сәттерімен шын жүректен құттықтаймын! Бүгін жас отбасы­лардың некесін қиып, үлкен өмірге қадам басуына тілектес­тік білдіреміз. Шын мәнінде, өмірде қол ұстасып бірге жүретін жастар көптеген сынақтан өтері анық. Осындай сәтте қиындықтан мүдірмей ақылмен шешім қабылда­ғаны дұрыс. Әрине, шағын мемлекеттің іргесін қалауда жастар татулықты, ізгілікті, жарасымдылықты басты ұстанымына айналдырса дейміз. Жастарға үлкен аға-апаларымыздың жолын берсін, – деді Салтанат Жанұзаққызы.

Сонымен қатар Сырдария аудандық азаматтық хал актілерін тіркеу бөлімінің мамандары жаңадан отбасын құрған Назарбай Меңдіғалиев пен Арайлым Бисенбаеваның, Нұрдәулет Дайрабаев пен Инабат Бүркіттің некесін салтанатты түрде қиды. Сонымен қатар жас отау иелері Балтабай Ордабеков мен Ләззат Қонысбекова, Мақсат Аманжолов пен Ақниет Құлсейітке ұйымдастырушылар тарапынан ерекше ілтипат көрсетілді.

Өнегеге толы, жастарға берері мол кеште аудандық мәдениет үйінің өнерпаздары әннен шашу шашты.

«Тт» ақпарат