Жалпы электриктерге қатысты «Электрик өмірде екі рет қателеседі. Біріншісі – оқуға түскенде, екіншісі – тоққа түскенде» деген әйгілі сөз бар. Электромонтер үнемі жоғары, төмен кернеулі тоқ жүйесімен жұмыс істегендіктен міндетті түрде техникалық қауіпсіздікке көңіл бөлуі керек. Әйтпесе тоқтың қауіптілігі сонша адам өмірін қиып жіберетін күші бар.

Кейіпкеріміз Сағи Сағидоллаев электр тоғының қауіптілігі туралы «тоқтың иісі, дыбысы жоқ, сондықтан қауіптің қай жағыңнан келетінін бағамдау қиын» дейді. Десек те осы қауіпті мамандықты ерлер атқаратын мамандық деп бекер айтпаған. Ер азаматтарға тән мамандық иесі атану үшін Сағи арнайы оқу оқып, алғашқы еңбек жолын мамандығы бойынша бастап, қазіргі уақытта 12 жылдан бері аудандық электр торабы мекемесінде аға шебер болып еңбек етеді.

5-разрядты электрик күнделікті жұмысына аса жауапкершілікпен қарайды. Тұрғындарға үздіксіз электр энергиясының берілуін қамтамасыз етуге атсалысады.

– Алғашқы еңбек жолым басталған тұста өз ісінің шеберлері атанған Марат Балдаев, Әмір Ерімбетовтен үйренгенім көп болды. Электриктің ешқашан қателеспеу керектігін де ұзақ жылғы еңбек өтілімде ұғынып келемін. Адам өміріне қаншалықты қауіпті болса да, адам өмірін жайлы ететін энергия қуатына жауапты маман екеніңді білу үлкен жауапкершілікті жүктейді. Қазіргі кезде кенттегі электрмен қамтамасыз ететін подстанция­лар мен бағаналардың 40 пайызы жаңартылған. Әлі ауыстыруды қажет ететін, тозығы жеткендері қаншама. Бұл әсіресе дауылды күндері қатты сезіледі. Ауа-райы қолайсыз болғанда мекеме­дегі барлық күш жұмысқа дайын тұрады. Қажет­ті техникалардың сақадай сай тұруы да маңыз­ды. Орын алған ақауды дереу жөндеуге кірісуге барлық монтерлер жұмылады.

Айту керек, биылғы жылы Шаған, Қалжан ахун ауылында электр желісін түгелдей жаңарту жұмыстары жүргізіледі, келер жылы кентте және А.Тоқмағамбетов ауылында электр­ге қатысты барлық жүйе жаңаратын болады, – дейді өз ісінің шебері Сағи Қуанышбекұлы.

Жұмысы қауырт әрі қауіпті электриктер күнделікті тұрғындарды қуат көзімен қамтама­сыз ету үшін 12 сағаттық кезекшілікке тұрады. Тұрғындардан кез келген ақауға байланысты өтініш келіп түссе, кезекші электрик пен жүргізу­ші орын алған ақауды жөндеуге келеді. Жұмыстың күрделілігіне байланысты мүмкіндігінше аз уақытта электр қуатын қайта іске қосуға күш салады.

Қауіпті жұмысты мінсіз атқару үшін мекемедегі электриктер әрбір 3, 6, 12 айда біліктілік сынақтан өтіп тұрады. Сонымен қатар күнделікті таңертең медици­налық қараудан өтіп барып, жұмыс­қа кіріседі. Бұл техникалық қауіпсіз­дік талаптарын сақтаудың ереже­сі.

Жас та болса аға шебер атанған Сағи электрик мамандығына кездейсоқ келмеген­дігін айтады. Оның айтуынша, өзі тұратын кенттегі Қазақ көшесінің тұрғындарының дені осы мекемеде ең­бек етеді. Сондықтан қалыптасқан дәстүр­мен, ізгі жолмен осы мамандыққа келгені­не қуанады. Әкесі қарапайым жұмыс­шы болған, анасы мұғалім қыз­метін атқарған үйінің үлкені Сағи өзін басқа мамандық иесі ретінде елестете алмайды. Күнделікті жұмысына асығатын өз ісінің шебері әріптестерінің арасында да беделге ие.

Қызметте абыройлы, отбасын­да қамқоршы аға болған Сағи келіншегі Арайлым екеуі – үлгілі отбасы.