Бірлік пен ынтымақ жарасым тапқан бұл отбасында тәрбиелі ұл мен қыз өсіп келеді. Тереңөзек­тік Жамбыл Кәрібаев жұбайы Мария Балжанова­мен ұзақ жыл бірге тату-тәтті тір­лік кешіп келеді. Ерлі-зайыптылар ауданда мемлекеттік қызметшілер ретінде саланың ауыр жүгін арқалап жүрген білікті мамандар. Атқаратын қызметі әртүрлі болғанымен мемлекет алдындағы қызметіне аса жауапкершілікпен қарайтын отбасында құт-береке берік орнаған.«Үлкенге – құрмет, кішіге – ізет» көрсету қағидасына ұйытқы болған аналары ардагер-ұстаз Гүлбар Әбілова шаңырақтың шырайын келтіріп, перзенттеріне жақсы жол сілтеуден жаңылған емес. «Әкеге қарап ұл өсер» дегендей ұрпақ жалғасы болған ұл Жамбыл әкесі Серікбайдан көрген өнегесін жалғастыруда. Ата-анасынан алған тәлім-тәрбиесімен өмірінің іргетасын ибалы да инабатты келін Мариямен қалап, ширек ғасырдан бері қол ұстасып бірге келеді. Алғашқы таныстық кезіндегі қызықты оқиғаны бүгінде керемет көңілмен еске алған шаңырақтың отанасы Мария қызықты етіп әңгімеледі:
– Екеуміз бір ауданда тұрсақ та, бір көшемен жүрсек те алғаш танысуымыз қала мен аудан арасына қатынайтын автобустың ішінде болды. Қалада оқитын кезіміз. Оқуға қатынап жүргенімізде жиі-жиі кезігетін болдық. 1996 жылы басталған таныстық екі жылға ұласып, бір-бірімізді әбден танып білдік. 1998 жылдың жазында шаңырақ көтердік. Жас болсақ та отбасы деген ұғымның киесін түсініп, құрметпен қарадық. Қандай қиындық болса да бірге жеңуге, қуанышты күндерді бірге өткізуге серттестік, – дейді жастық шағы туралы, қазіргі кезде ұл мен қызды дүниеге әкелген ана.Өмірлік серігін Жәкең деп атайтын келіншегі отбасындағы жарасымдылықты қазыналы қариялармен байланыстырады. Бірінен соң бірі дүниеге келген перзенттерін бауырына басып, сүйікті әже атанған аналары жас отбасының керегесі кең, босағасы берік болуына қамқорлық танытты. Баласы мен келінінің қызметтен қалмай алаңсыз жұмыс істеуіне жағдай жасаған ата-аналары өздері де қызметтен қалмай, ардагерлікке аман-есен жетті. Өкініштісі, қазір орталарында асқар таудай болып отыратын әкенің өмірден өткені.
Жоғары білімді маман ретінде қолына дипломын алып, 2000 жылы алғашқы еңбек жолын аудандық ауыл шаруашылығы бөлімінде бастаған Жамбыл мемлекеттік қызметтің қиындығы мен жауапкершілігін біле бастады. Тәжірибе жинаған жас маман салық комитетіне бас маман болып қызметке ауысты. Одан соң аудан әкімдігінде жетекші маман болып қызмет атқарды. Осы күні Қалжан ахун ауылдық округінде 7 жылдан бері бас маман қызметін абыроймен атқарып келеді. Ал келіншегі Мария кенттегі №36 орта мектепте кассир болып еңбек жолын бастаса, кейін Құндызды ауылдық округінде қызмет етеді. Кәсіби маман 2010 жылдан бері аудандық мәслихатта мемлекеттік қызметті мінсіз атқаруда.Ауданның әлеуметтік-экономикалық әлеуетін қа­лып­­­­тастыруда өзіндік жолдарын қалаған білікті мамандар қызметті адал атқарып, қоғамдық жұмыста да белсенділік танытады. Қызметтен бос уақытта спорт залына асығатын Жамбыл Серікбайұлы спорттың волейбол түрімен машықтанады. Шебер ойыншы талай мәрте аудандық, ауыларалық жарыстарға қатысып, команданың белді мүшесі атанды. Ағайынмен, құрбы-құрдаспен араласуға да уақыт табатын Жамбыл мен Марияның кісімен сыйластығы өзінше бөлек.
– Отбасылық достар ретінде көп жылдан бері араласамыз. Жамбыл мен Марияның адамгершілігі мен қарапайымдылығы туралы айтудың өзі ғанибет. Қазір арамызда балалары есейген жұп. Үлкендері оқу бітіріп, бір-бір мамандық иесі атанды. Кенжелері Даниял Талдықорған қаласындағы І.Жансүгіров атындағы университеттің соңғы курсында оқиды, болашақ экономист. Жамбылдың басты қасиеті – балажандығы. Балаларды өте жақсы көреді. Өз балаларына деген махаббатын айтып жеткізу қиын. Біздің де балаларымызға мейірімін төгіп тұрады. Тіпті құрдастардың кішкентайларын мойнына салып отырады. Кішіпейіл, ақкөңіл достарымызға ұзақ ғұмыр тілейміз, – дейді құрдастары Батырхан мен Гүлжанат.Бір салада табысты да жемісті еңбек етіп, шаңырақ шаттығына кенеліп отырған Жамбыл мен Мария жарасымды жұп қана емес, үлгілі отбасы. Біз де жұбайлар арасындағы сыйластық пен сүйіспеншілік, махаббат пен қамқорлық, адалдық өмір бойы жалғасын таба берсін деп тілейміз.