Отбасылардың ең басты құндылығы – олардың күнделікті өмірінен білініп жүрген патриоттық сезімі, үлкендерді құрметтеумен байланысты және бала тәрбиесінде, оқуда, еңбекте көрсетілген рухани-өнеге негіздерін ұрпақтан ұрпаққа жалғастыруы.
Республикалық «Мерейлі отбасы» байқауы шынында да бүкіл халықтың сүйікті мерекесіне айналды. Ал оның қатысуышылары мен жеңімпаздары-еліктеуге тұрарлық жарқын үлгі екенін атап өту керек.
«Мерейлі отбасы-2018» байқауының қалалық кезеңіне жолдама алған отбасылардың бірі қызылордалық Байдәулетовтер отбасы.
Отағасы Жорабек Байдәулетов «Орта Азия Көлігі» ЖШС-нің зейнеткері. Отанасы Алтынай Атабаева – «Күміс алқа» иегері. Отбасында 5 қыз, 1 ұл, 11 немере, 1 шөбере тәрбиеленуде. Балалары әр салада белгілі жетістікке ие.
Әулеттің құнды жәдігері – Байдәулет атасынан қалған емдік шипа кітабы. Кітапта барлық ауруға ем болатын рецептер қамтылған. Отбасы осы құнды кітапты атасының көзіндей сақтап отыр.
Өз ұлтының бетке ұстар мақтанышы болып келген тұлғалардың бірі – қазақ ойшылы, қоғам қайраткері Мұстафа Шоқай – Байдәулет Дабыловтың немере ағасы.