Ауыл мұғалімінің айтулы жетістігі

Газет беті қатталып, баспаханаға жіберілгелі жатқан сәтте аудандық мәслихат депутаты, білім қызметкерлері кәсіподақ комитетінің төрағасы Алмас Есназар хабарласып, сүйінші жаңалықты жеткізді. Айтуынша, ауданның білім саласы тағы бір белесті бағындырыпты.

Бұл жолы ауданымыздың белгілі ұстазы, №126 орта мектептің дене шынықтыру пәні мұғалімі Гүлмайра Құлтайқызы республика бойынша «Үздік дене шынықтыру пәні мұғалімі – 2023» аталымын жеңіп алыпты. Осыған орай аудандық білім бөлімінің басшысы Берік Жәнібеков ұстазды қабылдап, құрмет көрсетті. Қабылдауға №126 орта мектебінің директоры Б.Бақбергенова да арнайы қатысты.

– Гүлмайра Құлтайқызы – 22 жыл педагогикалық өтілі бар ұлағатты ұстаз. Педагог-зерттеуші өз мамандығының нағыз шебері. Өз біліктілігін арттыруда ізденімпаз, тынбайтын еңбекқор жан. Атап айтар болсақ, Ақтау қаласында өткен Президенттік көпсайыстан І орын алып, ҚР-ның кубогын жеңіп алды. 2023 жылдың мамыр айында Қызылорда қаласында өткен жеңіл атлетика және суда жүзу спорт түрлері бойынша қалалық ашық біріншілікте І орын иеленді. «Үздік дене шынықтыру пәні мұғалімі – 2023» аталымымен марапатталуы еңбегінің жемісі. Марапатыңыз құтты болсын, – деді бөлім басшысы.

Өз кезегінде Г.Құлтайқызы құрмет көрсеткен бөлім басшысына шынайы ризашылығын білдірді.

«Тт» ақпарат