Сайыпқыран спортшы
Бүгінде Сырдария ауданында волейбол спорты ерекше өркен жайып, бірнеше толқын тәрбиеленіп шықты. Қай жарысқа барса да, қоржыны бос қайтпайтын аудан құрамасының сапында ойнайтын Ержігіт Айбекұлы үздіктер қатарынан көрініп келеді. Облыс құрамасына шақырту алған оның бойындағы қабілетті бапкерлері жоғары бағалайды.Осыдан 15 жыл бұрын білікті бапкер Болат Рысмахановтың ізін қуған Айбек Сейпуловтың мақтаулы шәкірттерінің бірі – Ержігіт Айбекұлы екі мәрте ҚР чемпионы атанған. Сонымен қатар биыл ел біріншілігінде талабы таудай спортшы өз командасымен бірге қолаға қол созған. Жыл сайын дәстүрлі түрде өткізіліп келе жатқан Елеу Көшербаев атындағы халықаралық турнирдің жеңімпазы әркез бапкерлер үмітін ақтап келеді. Негізінен, жігері мықты спортшы 2008 жылы Тереңөзек кентінде дүниеге келген. №210 О.Әбілпаттаев атындағы орта мектепте білім алған Ержігіт жаңа оқу жылында «Болашақ» колледжінің табалдырығын аттамақ ниетте.
– Болашағынан зор үміт күттіретін шәкіртім қазіргі уақытта «Қайсар» волейбол клубының ойыншыларымен бірге Түркістан қаласында жаттығу жиынында. Әкесі – Айбек пен анасы – Қалдыгүлдің кенжесі Ержігіт волейбол спортын жетік меңгерген. Бойы 1.72 см болатын ойыншымыз қорғаушы ретінде байрақты бәсекелердің көрігін қыздырады. Жалпы, бізде спортшыларды аптасына 5 күн жаттықтырады. Спортшыларды физикалық, психологиялық тұрғыдан дайындауға көңіл бөлеміз. Кей жағдайда жарыс жолында ойын өрнегін өзгерте алатын спортшылар болады. Ержігіт сондай тегеурінді спортшылардың қатарында, – дейді жеке бапкері Айбек Сейпулов.
ҚР спорт шеберлігіне үміткер Ержігіт Айбекұлының туған әпкесі Нұрай да «Қайсар» волейбол клубының құрамына шақыртылып, алдағы чемпионатқа дайындық үстінде. Қос ағайынды волейболшылар Сырдария ауданының мақтанышына айнала бермек.
– Мен 4 сынып оқып жүргенімде волейбол спортына қызығушылығым артты. Бапкерлерім қойған әдіс-тәсілді сәтті орындап, жаттығулардан қалмай, жетістіктерге қол жеткізе білдім. Шын мәнінде, волейболшы бітім-болмысын бір қалыпта ұстағаны жөн. Біз үнемі шынығып, артық салмақ қосып алудан сақтанамыз. Әркез бапкерім мен ата-анам артқан үмітті ақтағым келеді, – деді құрама капитаны.
Балтабай АЯБЕКҰЛЫ
