Лагерьдегі бір күн
Жадыраған жаздың демалыс маусымы басталысымен кент сыртындағы «Жалын» сауықтыру лагерінің тыныс-тіршілігімен танысу үшін лагерьге аттандық. Біздер Қорқыт ата атындағы Қызылорда университетінің студенттері, болашақ журналистер редакция тапсырмасымен айналасы жасыл желекке оранған лагерь қақпасына кірдік.Ауасы таза, балалардың шат-шадыман көңілі жүрегіңе жылы әсер етеді екен. Балалық балдәурен шағымыз еске түсіп, осындай керемет жерде тыныққанымыз есімізге түсті. Жалпы лагерьдің жағдайы көңіл қуантарлықтай екені көзге ұрып тұр. Кіреберістен бізді қарсы алған лагерь гиды ең алдымен сауықтыру лагерінің тарихымен таныстырды. Лагерьдің негізі өткен ғасырдың 1988 жылы қаланған, балалардың денсаулығы үшін Қалғандария көлінің жағасында, табиғат аясында орналасқан. Жобаның қуаттылығы 130 орынға негізделген. Тұрғын үй жайлары қаз-қатар тізілген. Оның 9-ы жатын ғимарат, 1 медициналық бекет. Ғимараттардың көркі, тазалығы көз сүйсінтеді. Барлық үй-жайлар қажетті жиһаздармен, құрал-жабдықтармен, тазалық бөлмесімен жабдықталған. Сонымен қатар еңсесі биік 130 орындық асханада лагерь тынығушылары 5 мезгіл тамақтанады.
Тынығушылар жас тілшілерді көре салысымен құшақ жая қарсы алды. Маусымның басталғанына 5-6 күн өтсе де іштері пыспағаны, бір-бірімен достасып, үйренісіп кеткендері ұйымшылдықтарынан-ақ көрініп тұр. Орталарынан өзінің елгезектігімен көзге түскен Томирис Ернатқызы лагерь жөнінде ақпарат беріп, өзінің тынығу барысындағы әсерімен бөлісті.
– Біздің лагерьде 8 топ, оның ішінде 112 бала демалу үстінде. Және де 8 үйірме, сондай-ақ «Шаңырақ» алаңы жұмыс жасауда. Балалардың бос уақытын тиімді әрі көңілді өткізу мақсатында көптеген іс-шаралар, спорттық ойындар өткізіліп, топтық жұмысқа баса назар аударылады. Лагерьдің керемет жерде орналасуы, оның таза ауасы, әрбір тынығушының рухани дамуы үшін ұйымдастырылатын іс-шаралар менің осы лагерьді таңдауыма себеп болды, – дейді «Жасұлан» тобының мүшесі Томирис.
Тағы айта кететін жәйт, жеткіншектердің ынтасын әрі ойлау қабілетін дамыту, қызығушылығын қалыптастыру мақсатында шахмат, қалдық заттардан керек дүние жасау, қыздар игілігіне тоқыма тоқу, бұйым жасау сынды үйірмелер ұйымдастырылған. Бастысы, лагерьде балалардың қауіпсіздігіне аса мән беріледі.
Күні бойы тынығушылармен бірге болған уақытта ойға түйгеніміз, сырдариялық тынығушылар үшін жайлы орта қалыптасқаны әрі лагерь керек-жарақтың барлығымен жабдықталғанына қуандық. Тәрбиешілердің мейірімді әрі жұмысына адалдығына риза болдық. Алдағы уақытта алты ауысым бойы өз тынығушыларын құшағын айқара ашып, қарсы алатын лагерь ұжымына сәттілік тілейміз.
Мерей ЖАЛҒАСБЕК,
Мадияр БАҚЫТБЕК,
Қорқыт ата атындағы
Қызылорда университеті
журналистика факультетінің
1-курс студенттері
