Тіршілік тынысы Tirshilik-tynysy.kz ақпараттық агенттігі
» » Өнімнің таңбалануы туралы не білу керек ?

Өнімнің таңбалануы туралы не білу керек ?

Күнделікті өмірде өзіміз тұтынып жүрген азық-түлік, басқа да тауарлардың түріне, жалпы сипатына көпшілігіміздің мән бермейтініміз анық. Бұл дұрыс емес. Сондықтан, өзіңіз күнде дүкеннің сөресінен қолға алған затыңыздың сыртқы қорабына, жарамдылық мерзімі, шыққан жері, құрамындағы компоненттерін және басқа да өзіңізге қажетті ақпараттың барлығын саралап барып алғаныңыз жөн.

Тамақ өнімдерін таңбалауға қойылатын негізгі талаптар: тамақ өнімдерінің атауы; тамақ өнімдеріне қатысты құрамы, тамақ өнімдерінің мөлшері, тамақ өнімдерінің жасалған күні, тамақ өнімдерінің жарамдылық мерзімі туралы мәліметтер; дайындаушының сауда белгісі; тамақ өнімін дайындаушының атауы мен орналасқан жері, сондай-ақ Кеден Одағы Техникалық регламентінде белгіленген жағдайларда дайындаушының уәкілетті тұлғасының атауы мен орналасқан жері, импорттаушы-ұйымның атауы мен орналасқан жері; тауардың негізгі тұтынушылық қасиеттері туралы, тағамның биологиялық және энергетикалық құндылығы туралы мәліметтер және белгілі бір аурулар кезіндегі қарсы көрсетімдер туралы мәліметтер; тамақ өнімдерінің тағамдық құндылығының көрсеткіштері; тауар массасының шамасы, көлемі, саны; тамақ өнімдерінде генетикалық түрлендірілген ағзаларды қолданып алынған құрауыштардың бар-жоқтығы туралы деректер (өнімнің құрамында генетикалық түрлендірілген ағзалар болған жағдайда ГТА деп көрсетіледі); Кеден одағына мүше мемлекеттердің нарығында өнімдердің айналуының (ЕАС) бірыңғай белгісі болуы тиіс. Тамақ өнімдерін таңбалау орыс тілінде және Кеден одағына мүше мемлекеттердің заңнамаларында тиісті талаптар болған жағдайда Кеден одағына мүше мемлекеттердің мемлекеттік тілдерінде жазылуға тиіс. Буып-түйілген тамақ өнімдерінің таңбалауында қосымша деректер, оның ішінде соған сәйкес тамақ өнімі жасалған және сәйкестендірілетін құжат туралы деректер, тауарлық белгіге айрықша құқығы бар иесі туралы деректер, тамақ өнімінің шығарылған жерінің атауы, лицензиардың атауы мен орналасқан жері жазылуы мүмкін.

Өзіміздің денсаулығымызға пайдасы бар, құнарлы тағамдарды таңдай білу үшін, жоғарыдағы айтылған тамақ өнімдерін таңбалауына қойылатын негізгі талаптарға аса мән беруіміз қажет. Егерде сыртында таңбалануы толық жазылмаған жағдайда, сатушыдан ақпарат алуға болады және сатушы сізге тауар туралы толық, әрі нақты ақпаратты беруге міндетті. Бұндай ақпарат сіздің денсаулық жағдайыңызға тікелей байланысты болады. Осы ақпараттың бәрімен таныса отырып, сіз бірінші көзге түскен тауарды емес, сапалы әрі қауіпсіз тауар алып жатқандығыңызға сенімді боласыз. Сауатты тұтынушы сапалы және денсаулыққа зияны жоқ тағамдарды таңдайды.


Сапалы азық – денсаулық кепілі екенін ұмытпайық!

Жанар БИСЕНБАЙ,
Сырдария аудандық санитариялық-
эпидемиологиялық
бақылау басқармасының жетекші маманы
16 мамыр 2023 ж. 221 0