Алғыс арқалаған аяжан
Денсаулық сақтау саласында қызмет етіп жүрген ақ халатты абзал жандардың қай-қайсысы болмасын үлкен құрметке ие. Себебі адам жанының арашасы болып, антына адалдық танытатын жандар инесімен де, жылы шырайымен де науқас жанына шипа сыйлайды.Осындай жауапкершілігі жоғары қызметті он үш жылдан бері абыроймен атқарып, халықтың алғысына бөленіп жүрген жандардың бірі – Гүлзат Рахметова. Алғашқыда аудандық аурухананың балалар бөлімінде еңбек жолын бастап, тәжірибесін толықтырған ол бір жылдан кейін жан сақтау бөліміне ауысқан. Білімін толықтырып, тәжірибесін жетілдірген маман 2018 жылдан бастап жан сақтау бөлімінде отаға наркоз беретін жауапты маман болса, 2019 жылдан бастап осы бөлімде аға аяжан міндетін атқарып келеді.
Жалпы жан сақтау бөлімі атауының өзі денені дір еткізеді. «Жан сақтау». Мұнда ауыр науқастар түседі. Және де әртүрлі дертпен. Қарап отырсақ, бұл саланың қыз бала үшін қызығынан қиындығы мол. Ал анестезиолог деген отаға наркоз беретін, яғни денені уақытша жансыздандыратын маман. Ол дегеніңіз тіпті үлкен жауапкершілікті талап етеді. Себебі науқас наркозды көтере ала ма және оның белгілі мөлшері қандай деген мәселелер, әлбетте пациент денсаулығы басты назарда болады. Бұл жерде кәсібилік пен қырағылық аса маңызды. Саланың қызығы мен қиындығына бағыттап қойған сұрағымызға Гүлзат ерекше ынтамен жауап беріп, жігерлене түсті.
– Адам жанына араша түсу, әсіресе, ауыр дертпен түскен науқастарға көмек қолын созып, олардың құлан-таза айығып шыққанын көру жанға рақат сыйлайды. Жалпы отбасымда медицина саласын таңдағандар жоқ. Ата-анам, бауырларым түрлі салада қызмет етеді. Бірақ менің кішкентай күнімнен арманым ақ халат киіп, адамдарды емдеу болды. Осы мақсатты алдыма қойып, 2007 жылы мектеп бітіргеннен кейін Қызылордадағы медициналық колледжде білім алдым. Оны бітіріп, қызметке араласа жүріп, 2018 жылы анестезистка мамандығын игеріп алдым. Өзіңіз айтып өткендей, қазір жан сақтау бөлімінде аға аяжан міндетін атқарып келемін, – дейді Гүлзат Тұрмағанбетқызы.
Айта кетейік, науқас жанына демеу болып, саланың білікті маманына айналған Гүлзаттың туған жері – Сәкен Сейфуллин ауылы. Мектеп табалдырығын ақын атын иеленген ауылда аттап, сонда тәмамдаған. Гүлзаттың мектептегі, жоғары оқу орнындағы тәлім берген ұстаздары оның бүгінде білікті маман атануына үлкен септігін тигізген. Өзі жақсы адамның жанынан ылғи ақжүректі жандар табылатыны сөзсіз. Айтпағымыз, Гүлзат алғаш жан сақтау бөліміндегі қызметін бастаған сәтте бөлімнің сол кездегі аға аяжаны Райса Анасқызы оған көп нәрсені үйретіп, тәрбиелеген. Қызметтің қыры мен сырына қанықтырған ұстазы бүгінде жас маманның өмірлік құрбысы, жақын әпкесіне айналған.
– Гүлзаттың жауапкершілігіне риза боламын. Қай істі қолға алса да, соңына дейін жеткізіп, ықтияттап отырады. Отбасына да, қызметке де үлгеріп, абыройлы маман атанып, халық алғысына бөленіп жүр. Ең алғаш осы бөлімге қызметке орналасқанда білгеніммен бөлісіп, алдыңғы буын ретінде тәжірибемді үйретуге тырыстым. Өзі де ынталы, бір дегеннен екі айтқызбай істі шыр айналдырады. Қазіргі таңда да бөлім қызметкерлерімен әр істі ақылдасып, бірлесе шешіп отырамыз, – дейді аудандық аурухананың бас медбикесі Райса Анасқызы.
Ата-анасының үкілеген үмітін ақтап, бүгінгі таңда абыройлы еңбек етіп жүрген Гүлзаттың қызмет бабында жеткен жетістіктері де баршылық. Әркез көмек қолын созуға дайын тұратын жан ұжымдастар арасында да беделге ие. «Өзінің ісмерлігімен, көркем мінезімен айналасын үйіріп әкететін Гүлзат – халықтың алғысын арқалап жүрген білікті маман» деген жан сақтау бөлімінің меңгеруішісі Дастан Сәдірқожаевтың пікірі сөзімізді дәлелдей түседі. Адал еңбек лайықты түрде еленіп, Гүлзат әр жылдары аудан әкімінің, облыстық денсаулық сақтау басқармасының алғыс хаттарымен марапатталған.
Саламатты өмір салтын сақтауды өмірінің өзегі еткен Гүлзат Рахметова спортпен шұғылдануды да әдетке айналдырған. Қызмет пен отбасына теңдей үлгеріп, көзінің ағы мен қарасындай болған қос кішкентайына тәлімді тәрбие беріп жүрген аяулы жар, ардақты ана, инабатты келін, білікті маман – ата-анасының мақтанышы. Жұмыстан бос уақытында волейбол ойнауды жаны сүйетін ол өзі таңдаған мамандығын мақтан тұтады.
Адамзат баласын түрлі дерттен аман алып қалуда құрметті мамандық иесі абзал жандардың еңбегі ерекше. «Дерт көп, денсаулық біреу» деген. Алдына келіп, көмегіне жүгінген әр науқасқа жылы ұшырай кететін Гүлзат – өз ісінің білгірі. Бұл мамандықты таңдау үлкен жауапкершілік екені белгілі. «Адамдарға ұдайы көмек көрсету, ризашылығын алу үлкен мәртебе» дейді кейіпкеріміз.
Аружан МҰХАНБЕТҚАЛИ
