Аудан ұстаздарының жетістігі

«Өрлеу» біліктілікті арттыру ұлттық орталығының» Қызылорда облысы бо­йынша педагогикалық қызметкерлердің біліктілігін арттыру институтының ұйым­дастыруымен облыстық шығармашыл ұстаздардың «Тәжірибе алаңы» ұйым­дастырылды. Облыстық білім және ғылым қызметкерлерінің кәсіподақ ко­ми­тетінің қолдауымен өткен іс-шара қаңтар айының 2-4 күндері аралығында өт­кізіліп, оған сырдариялық ұстаздар да белсене қатысты.

«Тәжірибе алаңының» алғашқы күнінде облыс­тық кәсіподақ комитетінің төрайымы, депутат Г.Баба­бекқызы «Тәжірибе алаңына» 20 жыл толуымен құт­тықтап, шығармашыл мұғалімдерге сәттілік тіледі.

Өзара тәжірибе алмасу мақсатында өткізілген «Өр­леу» біліктілікті арттыру ұлттық орталығының тренері Ж.Жұбауованың «STEM 5E циклі», Ұ.Ешимованың «Нә­тижеге бағытталған топтық жұмысты басқару жә­не жоспарлау», О.Ормановтың «Заманауи білім беру жағ­дайында кәсіби бағдар беру­ді ұйымдастыру» тақы­рыбында өткізген ше­­­­­­бер сыныбы мұғалімдер үшін тиімді болды. Мұн­да ұстаздар өз пікірлерін ортаға салып, тәжірибелерімен бөлісіп, ерекше белсенділік танытты. Кеш соңында сырдариялық ұстаздар құрамасы «Ауыл кеші көңілді» мәдени іс-шарасында III орын иегері атанды. Ұйымдастыру алқасының жетекшісі С.Құсейіновтің жетекшілігімен «Алтын көмбе – 2023» танымдық ойыны ұйымдастырылды. Танымдық ойын нәтижесінде «Сырдария» құрамасы II орынға қол жет­кізді.

Шығармашыл мұғалімдердің тәжірибе алаңының келесі күнінде «Оқыту әдістемесін жетілдіру жолда­ры» атты идеялар аукционы, «Brain rain – 2023» интеллектуалды сайысы, «Әзілің жарасса...» әзіл-қалжың кеші, сондай-ақ спорттың дойбы, шахмат, тоғызқұмалақ, үстел теннисі түрлерінен жарыстар өткізілді. Идеялар аукционына командалар ішінен мұғалімдер өз идеяларын ұсынды. Оның ішінен Сырдария құрамасынан №132 орта мектептің қазақ тілі пәні мұғалімі, «Өрлеу» жастар сыйлығының иегері Гүлзат Аманкелдиева мен №137 орта мектептің ағылшын тілі пәні мұғалімі Меруерт Жақанова қатысып, нәтижесінде қос ұстаздың идеясы үздік 3 идея қатарынан көрініп, жүлделі ІІІ орын иеленді. Ал «Brain rain – 2023» интеллектуалды сайысына әр командадан 5 қатысушы қатысып, ко­мандалық сайыс өткізілді. Сайыс барысында әр түрлі саяси, пән бойынша логикалық сұрақтар қойылып, нәтижесінде ұстаздарымыз II орынға табан тіреді. Ал спорттық сайыс нәтижесінде үстел теннисі бойынша №42 мектеп-лицейінің ағылшын тілі пәні мұғалімі Нұрзат Қайып II орынға, дойбы сайысында команда мүшесі №210 орта мектептің математика пәнінің мұғалімі Заманбек Аманжолов II орынға ие болды. Мұнан бөлек «Әзілің жарасса» әзіл-қалжың кешінің қорытындысы бойынша «Сырдария» құрамасы II орын иеленіп, мерейді асырды.

Тәжірибе алаңының қорытынды күнінде «Кәсіби құзіреттілікті дамыту: мүмкіндіктер, тәжірибе мен стра­тегиялар» тақырыбында ғылыми-тәжірибелік кон­­­фе­ренциясы» тақырыбында ғылыми-тәжірибелік кон­фе­­­ренциясында №210 орта мектептің математика пәні мұғалімі Заманбек Аманбеков баяндама жасап, «Құр­мет грамотасымен» марапатталды. Сонымен бірге «Мұғалім мәртебесі» тақырыбындағы ақындар айты­сында оқ бойы, оза шауып, жоғары ұпай жинаған №129 мектеп-лицейінің музыка пәні мұғалімі Биболат Опа­беков ІІ орынды қанжығасына байлады.

Қорытынды кеште тәжірибе алаңының майталман­дары аудандық бiлім бөлімінің әдіскері Зәуре Біліс­баева, №139 орта мектептің көркем еңбек пәні мұға­лімі Жұлдызай Накипова, №42 мектеп-лицейінің биология пәні мұғалімі Гүлзат Абдрасилова «Тәжірибе ала­ңының 20 жылдық» төсбелгілеріне ие болды.

«STEM 5E циклі» бойынша сабақ құрастыруға №42 мектеп-лицейінің химия пәні мұғалімі Піржан Төлеген қатысып, үздік үштікке еніп, «Құрмет грамотасымен» марапатталды. Тәжірибе алаңында барлық іс-шараға қатысып, белсенділік танытқаны үшін №36 мектеп-лицейінің физика пәні мұғалімі Оразкүл Сейтакбарова «Алғыс хатпен», №137 орта мектептің ағылшын тілі пәні мұғалімі Меруерт Жақанова «Құрмет грамотасымен» марапатталды. Тәжірибе алаңы жұмысының қорытындысы салтанатты түрде облыстық білім және ғылым қызметкерлері кәсіподақ комитетінің төрайы­­мы Г.Бабабекқызы мен институт директоры Б.Елеусіновтың марапаттауларымен аяқталды.

Осылайша, аудан ұстаздары тағы бір шыңды бағындырып, өздерінің кәсіби білімдері мен тәжіри­бесін арттырып, жоғары жетістіктерге жетті. «Жаңа Қазақстанның болашағы мен ертеңі – жастар» дейтін болсақ, білім саласының қызметкерлеріне сәттіліктер мен толағай табыстар тілейміз!

«ТТ» ақпарат