Тіл мәртебесін биіктету – абыройлы борыш

Жақында Аманкелді ауылын­дағы №42 Қуаныш Баймағанбетов атындағы мектеп-лицей базасында «Тіл тұғыры – ұлт ғұмыры» та­қырыбында қазақ тілі мен әде­биеті пәні бірлестігінің ұйым­дас­тыруымен апталық өткізілген болатын.

Ана тіліміздің мәртебесін көтеру мақсатында жүзеге асқан апталық барысында қазақ тілі мен әдебиеті пәнінің мұғалімдері өзара тәжірибе алмасты. Өз кезегінде пән мұғалімі Перуза Миянова «Көңілді сәт» айдары бойынша салтанатты іс-шараны ашып берді. Сонымен бірге Жанат Искакова мектеп оқушылары арасында «Сөз мерген» сайысын ұйымдастырды. Ал Айдарлы, Жетікөл, Аманкелді ауылындағы білім ошақтарынан келген оқушылардың қатысуымен Маржан Алтынғазиева мен Құрманғали Құлымбетов «Brain-rain» интеллектуалды ойынына айрықша көңіл бөлді.

Апталық аясында «Оқуға құштар мектеп» жобасы аясында мектеп президенті Лаура Балғабай және Нұрболат Ташенов «Кітап оқыған адам – та­бысты адам» атты ойлы оқырман сайысында жи­налған жұртшылық арасынан кіл мықтыны анық­тады. Бүгінгі қоғамның өзекті мәселесіне ай­нал­ған ана тіліміз жайында сөз қозғаған білімді жастар жүйріктер бәсекесі – дебатта топ жарды. Сонымен қатар «Сөз зергері – Ғабит Мүсірепов» тақырыбындағы конференция сабағында жазушы­ның өмір жолы, шығарамышылығы көпшілікке кеңі­нен дәріптелді.

– Туған тіліміздің абыройын асқақтату – әрбір азаматтың борышы саналады. Себебі, ұлт болмысы, салт-дәстүрі, діні, мәдениеті осы тілімізден бастау алатыны мәлім. Біз ана тілімізді білуге тікелей міндеттіміз. Өйткені, тіл – ата-бабамыздан әрбірімізге қалған аманат. Тілдің көмегімен өнерді, білімді, ғылымды игереміз, өткен-кеткенімізді саралап, барынша сабақ аламыз. Тіл халықпен бірге жасайды, дамиды, өркендейді. Бұл ретте, №42 Қуаныш Баймағанбетов атындағы мектеп-лицей базасында өткізілген қазақ тілі мен әдебиеті пәні бірлестігінің апталығында көптеген маңызды мағ­лұматқа қанықтық. Ұстаздардың дайындығын жоғары бағалаймыз. Алдағы уақытта барлық пән бойынша апталық жүзеге асып тұрады, – дейді мектеп-лицей директоры Зейнұр Жаманқұлов.

Айта кетейік, апталықтың қорытынды кеші әдеби-музыкалық және театрландырылған қойы­лым­ға ұласты. Кеш барысында  Ғ.Мүсіреповтың «Ана» тақырыбындағы шығармасынан монолог оқылса, махаббат дастанының желісімен жазылған «Қозы Көрпеш – Баян сұлу» трагедиясынан үзінді көр­сетілді.

Балтабай ОРДАБЕКОВ