Үздік ауданның қала тұрғындарына тартуы

Күріштен тау тұрғызған астықты өңір халқы берекелі шаққа мерекелі көңіл-күймен жетіп отыр. Биыл Сыр диқандары 188 500 гектар жерге егін егіп, күріштің әр гектарынан 56,7 центнерден өнім алып, жарты миллионға жуық ақмаржан өндірді. Ал сырдариялық еңбеккерлер 20728 гектар жерге Сыр дақылын егіп, әр гектарынан 64 центнерден өнім алуды қамтамасыз етті. Соның нәтижесінде Сырдария «Агроөнеркәсіп кешенін дамытуда биылғы жылы ең жоғарғы көрсеткіштерге қол жеткізген Үздік аудан» атанды. Бұл – ырысты арттырудағы төккен тердің, тынымсыз еңбектің нәтижесі.

Облыс орталығында «Алтын дән» мерекесі өтіп, егінжай ерлері марапатталғаннан кейін жыл­дағы үрдіс бойынша жәрмеңке ұйым­дастырылды. Бұл жәрмеңкенің өт­кі­зілуі қала күні мерекесімен де тұспа-тұс келді. Осыған орай, үз­дік ау­данның еңбеккерлері қа­ла тұр­ғындарына тарту жасап, ауыл шаруашылығы өнімдерін нарық ба­ға­сынан арзан сатылымға шығар­ды. Қызылорда қаласындағы Жан­қо­жа батыр көшесі, «Реалбаза» ай­ма­ғында өткізілген жәрмеңкеге ке­лу­шілер қарасы қалың болды.

Жалпы, молшылық мерекесіне ау­даннан 54 көлікпен 30 түрлі ауыл шаруашылығы өнімдері жеткізілді. Атап айтқанда, жәрмеңкеде 15 тонна ақ күріш, 17 тонна жем, 15,5 тонна картоп, 21 тонна жуа, 8 тонна сәбіз, 13 тонна асқабақ, 350 литр сүт, айран, қымыз, 100 келі балық және ет өнімдері, бақша дақылдары мен көкөністер, нан өнімдері, мал азығы болатын жоңышқа, шөп прес­­тер нарық бағасынан әлде­қайда арзан сатылды. Барлығы 22 млн теңгені құрайтын 170 тонна ауыл шаруашылығы өнімдері түске дейінгі уақытта өтіп кетті.

Молшылық тойында қала хал­қының бақша өнімдеріне деген сұ­ранысы өте жоғары болды. Әсіресе, қауын-қарбыз, картоп секілді бақша дақылдарын қаптап тасығандар көп кездесті. Одан бөлек, Сырдың бас­ты дақы­лы – күрішті кезекке тұрып алған­­дар қарасы да қалың болды. Бұл жәрмеңкеде қыстық азы­ғын қам­даған қала тұрғындары өздері­нің ризашылықтарын жет­кізді.

– Халқымыз «Қос тойың қа­бат болсын» деп жатады. Сол айт­қандай, Қызылорда қаласының кү­ні, еңбеккерлердің «Алтын дән» мерекесі құтты болсын. Осы мерекелерге орай жыл сайынғы дәстүрмен жәрмеңке өткізіледі. Біз жәр­меңкені асыға күтеміз. Өйт­­кені, қыстық азықты осындай молшылық мерекесі кезін­де қамдап алатынымыз жасырын емес. Сондықтан Сырдария ауда­ны­ның еңбеккерлері биыл да мол өнімді қала халқына әкеліп жатыр. Жаз бойына тынымсыз ең­бек еткен еңбеккерлерге ал­ғы­сымыз шексіз. Осындай игі іс-шаралар жиі ұйымдас­ты­рыла берсін, – деді қала тұрғыны Г.Мығымбаева.

Айта кетейік, жәрмеңке­де қызылордалықтарға аудан өнерпаздары әннен ша­шу шашып, мерекелік кө­ңіл-күй сый­лады.

Е.ЖАППАРБЕК