Адамгершіліктің ең жоғарғы үлгісі

Ұстаз – осы білімге, мәдениет пен әдебиет­ке же­телейтін бірден-бір тұлға. Ұрпақ тәрбие­сінде мұға­лім­нің таланты, біліктілігі және жа­уапкершілігі, адами қасиеттері өте маңызды рөл ойнайды. Өйткені ол шәкірт үшін айна сияқты. Ұстазы жақсының – шәкірті үздік. Шәкірт санасына білім нәрін сеуіп, ел болашағының өрендерін тәрбиелеп шығару – екінің бірінің қолынан келе бермейді. Ұстаз болу – жүрек жылуын, мейірім шуағын, адамгершілік ұлылығын баланың бойына дарыту. Ұстаз болу – шәкіртке ата-анасындай болып тәрбие беру. Ұстаз болу – жас ұрпақтың жарқын болашаққа барар жолын айқындай алу. Ахмет Байтұрсынұлы «Мұғалім – мектептің жаны» деп бағалаған. Осыдан-ақ, ұстаз деген ұлы есім екенін талассыз аңғаруға болады. Себебі, ұстазға деген құрмет бәрі­нен биік тұрады.

Қазан айының алғашқы аптасы – ұлағатты ұстаздар күні. Тарыдай болып кірген мектептен таудай етіп шығарған алтын ұстаздарымның мен үшін орны бөлек. Алғаш мектеп табалдырығын аттаған сәттен бізді өз қанатының астына алып, таудай білім мен жан байлығын бойымызға сіңірткен аяулы ұстаздарыма шын пейілмен алғыс айтамын. Ұстаздар күні мерекесімен барша ұстаздарды және арнайы Т.Қозыбаев атындағы №131 орта мектеп мұғалімдерін құттықтаймын. Құрметті менің аяу­лы ұстаздарым, отбасыларыңызға береке, дендеріңізге саулық, жұ­мыс­тарыңызға шы­ғар­машылық табыс, толағай жеңіс тілеймін. Ұрпақ тәрбиелеу ісіне қосып жатқан үлес­теріңізге және саналы шәкірт тәр­биелеп жатқандарыңызға мың алғыс! Сіздер берген сарқылмас білімнің арқасында мен Қорқыт ата атындағы университет студенті атан­дым. Сіздер салған дара жол­мен жүріп үлкен өмірге қадам басу­дамын. «Ұстаздық – ұлы жол» деген. Сол жолдан шарша­май, ерен еңбекпен бар баланы тәр­бие­леп, білім нәрін бо­йға дарыт­қан­дарыңызға алғысым шексіз. Білімімен биікке шығарар шәкірт­теріңіз көбейе берсін. Сіздердей жанашыр, ұлағатты ұстаз­дардың шә­кірті болу – біз үшін үлкен бақыт. Еңбектеріңіз еселене берсін!

Фариза ЖҰМАТАЕВА,
студент