Халық белсенділігі жоғары болды

«Бұл референдум Қаңтар оқиғасының қай­та­ланбауының кепілі». Мемлекет басшысы Қасым-Жомарт Тоқаев Конституциялық референдумда дауыс беріп, таңдау жасағаннан кейін журналистерге берген сұхбатында осылай деді. Маусымның бесінде ұйымдастырылған сая­си іс-шараның егемен еліміз үшін маңыздылығын осыдан-ақ аңғаруға болады.

Естеріңізде болса, Қазақстан халқы Ассамблеясының сәуір айының соңында өткен «Ел бірлігі – жаңарған Қа­зақ­­­­­­­­­­­­­­­станның тірегі» атты ХХХІ сессиясында Ел Президенті Ата Заңға өзгерістер мен толықтырулар енгізу жөнінде республикалық референдум өткізуді ұсынған болатын.

Президенттің республикалық референдум өткізу ту­ра­лы ұсынысы зиялы қауым өкілдері, сарапшылар, қоғам қайраткерлері мен жалпы халық тарапынан қол­дау тапты. Еліміздің барлық өңірінде заңға енгізілетін өз­ге­рістер жөнінде кең көлемді түсіндірме жұмыстары жүр­­­­­­­гізілді. Парламент депутаттары, республикалық, об­­­­лыс­тық және аудандық штаб мүшелері кездесулер ұйым­­­­дастырды. Нәтижесінде ха­лықтың 5 маусымдағы референдумға қатысу көрсеткіші жоғары болды. Оның ішінде сырдариялықтар да ерекше жауапкер­ші­лік­пен өз таңдауларын жасады. Мұны біз әлеуметтік же­лі­лердегі жергілікті ха­лықтың пікірінен анық аңғар­дық.

Бұл күні дауыс беруге алғашқылардың бірі болып Ұлы Отан со­ғысының ардагері Яхия Тасыров келді. Майдангер №155 сайлау учас­­кесіне келіп, таңдау жасады. Осы сайлау учаскесінде аудан әкі­мі М.Ергешбаев та өз таңдауын жасап, жұртшылықпен жүздесті. Аудан басшысы тұрғындардың белсенділігі жоғары екенін айтып, рефе­рен­думның нәтижелі қоры­тын­дылануына сәттілік тіледі.

Негізі таңғы сағат 07.00-ден бастап аудан халқы референдумда дауыс беруді бастап кетті. Кентте 4 референдум учаскесі жұмыс істесе, аудан бойынша 18 референдум учаскесі халыққа қызмет көрсетті. Бұл күні тиісті заңнама талаптарына сай партия өкілдері, қоғам бел­сенділері, үкіметтік емес ұйым өкілдері рефе­рендумның өту барысын байқады.

Референдум барысында Сыр бойы халқының мемлекетте жаңа өз­герістердің болғанын зор сеніммен қолдайтыны аңғарылды. Алдын ала жүргізілген есептеулер қорытындысында облыс тұрғындарының ба­сым бөлігі референдумға қатысқаны жарияланды. Демек, өңір жұрт­­шылығы Жаңа Қазақстанға бет алып, жаңаша өзгерістерге иек арт­қанды жөн санайды. Ал өзгерістер кезеңінде еліміз үшін әрбір азаматтың пікірі мен дауысы маңызды екені сөзсіз.

Ақтөре ИБРАГИМҰЛЫ