Жемқорлыққа жол жоқ
Сырдария аудандық қазынашылық басқармасында «Сыбайлас жемқорлыққа қарсы мәдениет» тақыбырында дөңгелек үстел кездесуі өтті. Бұл кездесуге «Аmanat» партиясы Сырдария аудандық филиалы жанындағы сыбайлас жемқорлыққа қарсы іс-қимыл жөніндегі қоғамдық кеңестің төрағасы Ш.Нұрсейітов арнайы қатысты.Онда басқарма басшысы З.Рақымшаева сыбайлас жемқорлыққа қарсы іс-қимыл шараларының бірі – сыбайлас жемқорлыққа қарсы мәдениетті қалыптастыруды қамтитынын айтты. «Бұл заңның 9-бабында қаралған, – деді З.Рақымшаева.
– Сыбайлас жемқорлыққа қарсы мәдениетті қалыптастыру – сыбайлас жемқорлыққа құзыреті шегінде жүзеге асыратын қызмет, ол білім беру, ақпараттық және ұйымдастырушылық сипаттағы шаралар кешені арқылы жүзеге асырылады. Сыбайлас жемқорлыққа қарсы білім беру – тұлғаның адамгершілік, зияткерлік, мәдени тұрғыдан дамуы және сыбайлас жемқорлықты қабылдаудағы белсенді азаматтық ұстанымын қалыптастырады.
Басқарманың операция тобының бас маманы Индира Сәрсен қызметкерлердің бойындағы парасаттылық, оның маман ретіндегі құзіреттілігі, сондай-ақ заңсыз әрекеттер жайлы айтып келіп:
– Қазақстан Республикасының мемлекеттік қызметі қоғам өмірінде ерекше рөл атқарады. Ол қоғамның тыныс-тіршілігін қамтамасыз етуді және қоғамдық мүдделерді ең үздік және тиімді тәсілмен қанағаттандыруды білдіреді. Қоғам мемлекеттік қызметшілер өз міндеттері мен функцияларын заңдарға сәйкес барлық адал ниетімен құзыретті және тиімді түрде орындайды деп сенеді. Қоғам мен мемлекеттің сенімінен шығу үшін мемлекеттік қызметшілер адал, әділ, сыпайы, қарапайым болуы тиіс. Қызмет бабын жеке мүддесіне пайдалануға болмайды. Олардың Отанға деген адал ниеті, парасатты болуы шарт. Дана ақын А.Құнанбайұлының сөзімен, олар пайда ойламай, ар ойлауы тиіс. Ар дегеніміз – тазалық. Отанымыз – біреу, ол – Қазақстан. Отанымыздың болашақтағы бейнесі халықтың мүддесінен шығуы үшін және кейінгі ұрпақ алдындағы парызымыз адал, тиісінше болуы үшін – тазалықты әр азамат өзінен бастауы қажет. Заң аясында әрекет еткен жағдайда мақсат қойған Жаңа Қазақстанның іргетасының мықты болатынына сенім мол, – деді.
Дөңгелек үстел барысында сыбайлас жемқорлықтың алдын алу, болған жағдайда оған берілетін жаза, парақорлық пен делдалдық жөнінде жан-жақты айтылды.
Сондай-ақ аудандық штаб мүшесі Ш.Нұрсейітов басқарма қызметкерлеріне референдумға байланысты түсіндірме жұмыстарын жүргізді.
Ш.Балтабайұлы
