Шіркейлілік жастың жетістігі

Жақсы жаңалықтың жаршысы атанған аудан айнасы «Тіршілік тынысы» газеті редакциясы тағы да оқыр­ман­­дарына қуанышты хабар жеткізбек.

Жақында №129 Ә.Жәмішев атын­дағы мекеп-лицейдің 10 сынып оқушы Жанбота Тәңірберген«Менің Отаныма – менің бастамам» республикалық шы­ғармашылық жобалар байқауының жеңімпазы атанды. Дарынды оқушы «Қа­зақстанның 100 жаңа есімі» номи­нациясының жүлделі екінші орнын ие­ленді.

Дарынды балаларды анықтауға жә­не қолдауға бағытталған, балалар мен жастардың бастамаларын дамытуға ық­пал ету мақсатында өткен байқауға елімізден 170 талапкер қатысқан. Бай­қау республикалық қосымша білім бе­ру оқу-әдістемелік орталығы Қа­зақ­стан­ Республикасы Білім және ғылым минис­трлігінің тапсырмасы бойынша қа­шықтық форматты өткен.

– Ғылыми жобаның негізгі міндеті – балалардың назарын өзекті әлеуметтік мәселелерге аудару, әлеуметтік-шы­ғар­машылық белсенділіктерін, өзін-өзі жетілдіру, дамыту, қосымша бі­лім­­мен қамтылған балалар санын арт­ты­ру­ға ықпал ету болды. Осыған орай оқушым Жанботамен «Өмірден алып кетем үлесімді» тақырыбында қай­сар ақын Н.Әбілқасымовтың өмірі мен шы­ғар­ма­шы­лық жолына арналған ғылыми жоба дайындадық. Жобада қиын сынаққа мойы­маған қайсар азамат, туған жер­дің талантты түлегі, өмірге құштар жан Нұрмұхаммед Әбілқасымовтың өнегелі өмір жолы өскелең ұрпаққа үлгі етілді, – дейді ғылыми жоба же­текшісі, қазақ тілі мен әдебиеті пәнінің мұғалімі Күмісқал Қожарипова.

170 баланың арасында оза шауып бәйге алған ғылыми жоба – ұзақ ізденістің, шығармашылық жолдағы жетістіктің нәтижесі. «Өмірден алып кетем үлесімді» атты еңбектің негізгі бөлімі «Жұмыр жер құшағың нет­кен кең еді» деп басталып, онда ақынның өмірі баяндалады. Содан соң ғылыми жоба «Аузыма ағаш тістеп, өлең жаздым» деген тақырыппен кейіпкердің ақындық жолына арналған. Ақынның жетістіктері «Өршіл рухты жанмын мен, өлеңім барда өлмеспін» деген бөлімге топтасқан. Жобаның соңғы бөлімі отбасына арналып, «Мен сеземін махаббат айдыныма, бір аққудың айсыз түнде қонатынын» деген тақырыпқа арқау бо­л­ыпты.

– Сыр бойында туып-өсіп, мүмкіндігі шектеулі болса да, өмір сүруге ға­шық жан ту­ралы ғылыми жоба жазу мен үшін үл­кен жауапкершілік болды. Ту­ған ауылдың перзенті Нұрмұхам­мед Әбіл­­қасымовтың өмірі мен шығарма­шы­лығы ғылыми жобаға арқау болды. Бала жасынан қиындыққа еш мойы­май келе жатқан 44 жастағы ақын тағ­дырдың жазуына қарсы тұрды, жігерін қайрады. Жүрегінен жарып шыққан жыр шумақтарын жазды. Қағаз бетіне жазуға дәрмені болмаса да аузына кішкене таяқша тістеп, сол арқылы ұялы телефонның тетіктерін басып, өлең жазды. Нұрмұхаммед ақын өлең жазумен қатар шахмат, дойбы ойна­ғанды ұнатады. Сурет салуды, әсіресе, жылқының суретін салғанды жа­ны қалайды. Өзін тұсаулы тұлпарға теңей­ді. Осындай тағдыр иесін қоғамға үлгі ету пер­зенттік парызым деп білдім, – дейді дарынды оқушы Жанбота.

Жас ғалымның ізденісі мен талабы әлі талай жетістіктерге жеткізіп, ұстаз еңбегінің жемісін беріп, мерейін үстем етері сөзсіз!

Бибісара ЖАНӘЛІ