Шашы ұзын қыз
№35 Иса Тоқтыбаев атындағы мектеп-лицейінің 5-сынып оқушысы Дильнара Спандиярованы сыныптастары «Шашы ұзын қыз» деп атайды. Расында да озат оқушыны ұзын шашы өзгелерден ерекшелеп тұрады. Көктем мерекесінде шашы ұзын бүлдіршінмен пікірлесудің сәті түсті.Дильнара егіздің сыңары екен. Ол «шашымды кішкентай кезімнен бастап өсіремін» дейді. Оқушының шашының ұзын болуына анасы Алма Сматованың көп әсері бар. Анасы қызының шашын таза ұстап, тарауға, ұзын болып өсуіне ерекше мән береді.
– Әкем де, анам да – менің жанашырларым. Бізге жақсы тәрбие беріп, қамқор болып келеді. Үйде ата-анамнан бөлек ағам Асқар мен сыңарым Айдара бар. Менің шашым ұзындау болса, Айдараның шашы қатты ұзын емес. Қыз баланың шашы ұзын болғаны дұрыс деп ойлаймын, – дейді Дильнара бізбен әңгімесінде.
Озат оқушының сынып жетекшісі – Жанат Нұрланқызы. Мұғалім өз шәкіртінің сабағы кіл бестік екенін айтады.
– Сыныбымызда озат, алғыр оқушылар көп. Біз ер балаларға да, қыздарға да тәртіпті, тәрбиелі болуды насихаттап, бағыт-бағдар беріп келеміз. Дильнара қазақ тілі, математика, орыс тілі пәндерін сүйіп оқиды. Болашағынан көп үміт күтеміз, – дейді ұстазы.
Айта кету керек, құрылыс саласының майталманы Қожамұрат Сматов пен Несібелі Қыдырбайқызы – Дильнараның нағашы ата-әжесі. Олар немерелерінің ақылды, тәрбиелі болып өсіп, Спандияровтар әулетінің үміті мен сенімін ақтап, жоғары белестерді бағындырғанын қалайды. Ал білімге құштар шашы ұзын қыз мектепті «Алтын белгіге» бітіріп, ақ халатты абзал жан болғысы келеді.
Ақтөре ИБРАГИМҰЛЫ
