«Цифрлық Қазақстан»: Электронды құжаттарды рәсімдеуді жеңілдетеді

Бүгінде жергілікті халықтың басым көпшілігі сан түрлі құжат дайындау үшін арнайы мекеме мамандарының қызметіне жүгінеді. Нарық заманында құжат айналымын сапалы әрі тиімді жүргізу үлкен жауапкершілікті қажет етеді. Күн сайын жүзге жуық адамға қызмет ететін «Азаматтарға арналған үкімет» мемлекеттік корпорациясы» КЕАҚ Қызылорда облысы бойынша филиалына қарасты аудандық бөлімнің мамандарының жұмысы қауырт. Сала мамандары тынымсыз еңбектің арқасында тұрғындардың өтініш-тілектерін қанағаттандыруда. Өз кезегінде өткен жылы атқарылған жұмыстар жөнінде бөлім басшысы, аудандық мәслихат депутаты Жұмабек Ембергеновпен сұхбаттасқан едік.

– Жұмабек Әшімұлы, Сіз басқаратын бөлім қай кезде де жергілікті халықпен тығыз байланыста. Сұхбатымызды саладағы құрылымдық өзгерістерден бастасақ.

– Иә, біздің кәсіби мамандарымыз күнделікті тұрғындардың құжаттарын дайын­даумен айналысып ғана қоймай, олардың мәселелерін шешу жолдарын қарастырады. Әрбір маман алдына келген кісінің түйткілді мәселесін саралайды. Одан кейін құжаттарын рәсімдеуге кіріседі. Жалпы, «Жеке және заңды тұлғаларға көрсетілетін мемлекеттікқызметтердің тізілімін бекіту туралы» ҚР Үкіметінің №983 Қаулысына сай бөлімде есепті мерзімде барлық сала бойынша 21 966 өтініш қабылданған. Нәтижесінде, 20 960 өті­ніш азаматтарға табысталған. Құрылымдық жұмыстар арнайы заң шеңберінде жүзеге асырылады. Былтыр бірыңғай байланыс орта­лығына 124 өтініш келіп түскен. 1414 нөміріне хабарласқан тұрғындардың барлық мәселесі қанағаттандырылған.

Өткен жылы белгілі бір себептерге байланысты  99 құжат бас тартылса, 54 құжатқа  мерзімі бұзылғаны үшін акт жасалған. Біздің бөлімде өзін-өзі қызмет көрсету секторы бар. Мұндай қызмет түрі бойынша 37 500 адамға кеңес берілсе, 37 000 жеке және заңды тұлғаға қызмет көрсетілді.

– Сала мамандарының имиджін кө^­теру мақсатында қандай жұмыстар атқа­рылуда?

– Қазіргі уақытта бөлімде 15 адам жұмыс жасайды. Халыққа қызмет көрсетуге ар­налған 8 қызметкер жасақталған. 4 маман азаматтардың құжаттарын қабылдаса, 1 маман дайын құжаттарды беру және ХТҚ яғни жеке куәлік, төлқұжат берумен айналысады. 4 қызметкер «Өзіне-өзі қызмет көрсету секторында», 1 қызметкер «Құжаттандыру және тіркеу тіркелімі» бөлімшесінде еңбек етеді. Айта кетейік, Ұлы Отан соғысы ардагерлеріне және оған теңестірілген азаматтарға кезектен тыс 1 маман қызмет көрсетеді. Сонымен бірге құжаттандыру саласы бойынша бөлім «Халықты құжаттандыру және тіркеу пункті» ақпараттық жүйесі арқылы көрсетілетін мем­лекеттік қызметке аудандық полиция бөлі­мінің Көші-қон полициясы тобының жауапты 1 қызметкерімен, қызмет алушылармен мемлекеттік қызметтер бойынша төлем төлеу үшін «Қазпошта» АҚ-ның Сырдария бөлімінің кассасымен қамтамасыз етілген.

Ұжымда іскерлік этиканы қалыптастыру жолға қойылған. Күнделікті жұмысқа келген қызметкерлерімізбен семинар-тренинг ұйым­дастырамыз. Сала мамандары үйдегі эмоцияны, жағымсыз энергияны ойынан шы­ғарады. Тек жұмысқа ынта қойып, халыққа сапалы қызмет көрсетуге міндеттенеді.

Сонымен бірге сала мамандарының қызме­тіне жүгінген тұрғындар оларды электронды түрде бағалай алады. Жақсы бағаға ие болған сала мамандарының суреті мен аты-жөні ай сайын құрмет тақтасына ілініп отырады. Бұл олардың жұмысты ынтамен, жауапкершілікпен атқаруға оң әсер етеді.

Сала мамандарының имиджін көтеру тұ­рақ­ты түрде жүргізіліп келеді. Атаулы күн­дерде қыз­меткерлерімізді ынталандырып оты­р­а­мыз. Кәсіби біліктілігін жетілдіру мақ­сатында республикалық деңгейдегі мекемелер жұмыс жасайтын әріптестерімізбен тәжірибе алмасып тұрамыз. Ал халыққа қызмет көрсету саласының имиджін көтеру бағытында аудан тұрғындарының «Электронды Үкімет» порталын пайдаланудағы компьютерлік сауат­тылығын арттыру және Е-gov» бұрышы­ның жұмысын жоғары деңгейге көтеру үшін іс-шаралар жоспары жасалған.

– Электронды қызмет сапасын арттыру бойынша жасалған жұмыстарға тоқталып өтсеңіз.

– «Мобильдік ХҚКО» бойынша 1371 құжат қабылданып, 1362 дайын құжат өтініш иелеріне табысталды. «Мобильдік ХҚКО» жұмысын насихаттау, елді мекендерге қызмет көрсету кестесі ай сайын жергілікті әкімдік сайтына жарияланады. Бөлімде есепті мерзімде оқыту жос­парына сай «Электронды Үкімет» порталын пайдалану, КРІ жүйесі, «Электронды құжат айналымы» нұсқаулығы бойынша семинар-сабақтар өткізіліп тұрады. Мұнан бөлек, жаңадан жұмысқа қосылған қызметкерлермен жеке оқыту сабағы өткізіліп, сынақ қабыл­данады. Бөлімнің өткізілетін іс-шаралар жос­пары бойынша бөлім қызметкерлерінің жұ­мыс сапасын жақсарту, біліктілігін арттыру мақ­сатында жергілікті уәкілетті органдармен байланыс орнатамыз.

– Пандемия уақытында «Азаматтарға арналған үкімет» мемлекеттік корпорациясы» КЕАҚ Қызылорда облысы бойынша филиалына қарасты аудандық бөлімінің жұмысы тежегенін жақсы білеміз. Мұндай уақытта халықпен қар­ым-қатынас орнату қиындық соқтыр­мады ма?

– Есепті кезеңде мемлекеттік қызмет сапасына байланысты келіп түскен арыз шағым­дарғакелетін болсақ, жеке және заң­ды тұлға­лардан арыз-шағым келіп түскен жоқ. Дегенмен, қашықтықтан қызмет көрсету кезінде қиындық соқтырғаны рас. Шаруасы уақытылы біткенін қалайтын жергілікті халық арасында түсініспеушілік туындап жатады. Кезектілік бойынша кіретін азаматтар ара-қашықтық сақтауға құлық танытпайды. Коронавирус инфекциясы қайта өршіген жағдайда онлайн қызмет жасауға міндеттіміз. Негізі тұрғын­дарға «Е-gov» порталы арқылы онлайн қызмет жүйесін пайдалану тиімді.

– «Цифрлық Қазақстан» бағдарла­масы аясында электронды қызмет түр­лері артты. Мемлекеттік маңызы бар құрылымдарда  сыбайлас жемқорлыққа жол бермеу мақсатында қандай жұмыс­тар атқарылуда?

– Сыбайлас-жемқорлыққа төзбеушілік көз­қарас танытуымыз керек. Қазір кейбір азаматтар барлық мәселе пара берумен шешіледі деп ойлайды. Бұл дұрыс емес, қате пікір. Шын мәнінде, электронды үкімет порталы жекелеген адам­дардың құжаттамалық өтініштерін автоматты түрде шешуге атсалысады. Барлық саланы электронды форматқа көшіру арқылы қағазбастылықтан арылу міндеті тұр. Мәселен, тұрғындар қажеттілігіне орай маманның кеңе­сі арқылы өз құжаттарын электронды түр­де рәсімдей алады. Бұл ретте, заңды және жеке тұлғалар электронды қызметті пай­далана отырып, «Цифрлық Қазақстан» бағдар­ламасының игілігін көрмек. Әрине, бі­лім, медицина, мемлекеттік қызмет секілді бір­неше құрылымдық мекемелер  «Цифрлық Қа­зақстан» бағдарламасына көшкен. Электронды порталдардың мүмкіндіктерін жетілдіру мақ­сатында тиісті іс-шаралар қабылдана бермек. Себебі Мемлекет басшысы Қасым-Жомарт Тоқаев «Жаңа жағдайдағы Қазақстан: іс-қимыл кезеңі» тақырыбындағы Қазақстан хал­­қы­на Жолдауында цифрландыру – барлық рефор­маның негізгі элементі екенін айтқан болатын. Ұлттық бәсекеге қабілетті болудың негізгі құралы – цифрландыру екенін білеміз. Алдағы жылдары осы саланы дамыту үшін мол инвес­тиция құйыла бермек. Негізінде электронды қызметті жандыра алсақ сыбайлас жемқорлық фактілерін азайта аламыз. Бұл ретте, бөлім мамандары мен мемлекеттік қыз­мет­керлерге сыбайлас-жемқорлықты ал­дын алуға байланыс­ты семинар-тренингтер өт­кізіледі.

 – Электронды қызмет түрлерінің не­гізгі артықшылықтарын айтып берсеңіз?

– Жергілікті тұрғындар мемлекеттік қызмет көрсету үшін БАЖ төлемдерін QR-код арқылы тө­­леу мүмкіндігі бар. Электронды қызмет түр­­леріне алынатын төлемдер жекелеген бан­к­­­­­­­­­­­­­­­­­­­­­­­­­­тердің қосымшалары арқылы алынады. Сонымен бірге «Е-нәтиже» бағдарламасы бойынша елді мекендердегі әкімдіктерден өтініштер келіп түсіп, толықтай жауап берілді.

– «Азаматтарға арналған үкімет» мем­лекеттік корпорациясы» КЕАҚ Қызылорда облысы бойынша филиалына қарасты аудандық бөлімнің ғимаратына жөндеу жұмыстары жүргізіле ме?

– Биыл әріптестерімізді қуантатын жаңа­лығымыз бар. Біз отырған ғимарат 2007 жылы пайдалануға берілді. Арада 15 жыл өтті. Бұған дейін ғимаратқа ағымдағы жөндеу жұмысы жүргізілді. Биыл күрделі жөн­деу жұмыстары жүр­гізіледі деп жоспарлануда. Айта кетейік, күр­делі жөндеу жұмыстары кезінде ғимараттың кескіндік келбеті жаңарып, мүмкіндігі шектеулі жандарға арналған ғимарат ішінен әжетхана салынбақ.

Сұхбаттасқан Б.ОРДАБЕКОВ