Кент әкімі болуға кім лайық?

Күні ертең Тереңөзек кентінің әкі­­мін сайлаймыз. Иә, кент, ауыл әкімдерін бұрынғыдай мәслихат депутаттары емес, қазір халық сайлап алады. Осыған байланысты ау­дан орталығында тұратын 7190 сайлаушы 20 ақпанда таңдау жасап, Те­реңөзектің дамуына тынымсыз ең­бек ететін әкімді сайламақ. Кент тұрғындарының сеніміне ие болу үшін бүгінгі күнге дейін 3 үміт­кер өз бағдар­ламаларын ұсы­нып, үгіт-насихат жұмыстарын жүр­гізді.

Бейресми ақпаратқа сүйенсек, әкім болуға 6 үміткер құжат ұсынған. Солардың үшеуінің құжаттары дұрыс болмай, үміткерліктен бас тартса, үш үміткер тіркелген. Олардың қата­рында «Қазақстан Халық» партиясынан Ба­қыт­жан Сәрсенов, «Nur Otan» партиясынан Ержан Бахтияров және өзін-өзі ұсынушы үміт­кер Иранбек Мақаш бар.

Үш үміткер де аудан жұртшылығына жақ­сы таныс. Б.Сәрсенов ұзақ жылдар бойы­­на ау­­данның ауыл шаруашылығы саласын да­­мытуға атсалысып келеді. Еңбек жолында Те­рең­өзек кенті әкімінің орынбасары, Қоға­лы­көл ауылының әкімі лауазымдарында бол­ған. Де­мек әкімдік жұмысын үйлестіруде тә­жі­ри­­бесі жеткілікті деген сөз. Десе де келер жылы Б.Сәрсенов құрметті зейнет демалысына шығады.

«Nur Otan» партиясынан үміткер Ержан Бах­тияровтың да бұл салада тәжірибесі мол. 2016 жылдан осы күнге дейін аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы қызметін атқарып келе жа­тқан білікті маманның еңбек жолы аудан әкімдігінде басталған. Бес жыл кент әкімінің орынбасары қызметін де атқарған. Яғни Те­рең­өзек кентінің әлеуетін біледі деген сөз.

Ал өзін-өзі ұсынушы И.Мақаш аудандық экономика және бюджеттік жоспарлау бөлі­мінде сектор меңгерушісі қызметін атқарып келеді. Қаржы саласында біліктілігі жоғары екенін еңбек жолының аудандық қаржы бө­лімінен басталып, аудандық экономика және бюджеттік жоспарлау бөлімінде маман, бас маман, сектор меңгерушісі болып, қызметінің сатылап жоғарылағанынан анық аңғаруға болады. Әрине әкім болу үшін есеп-қисапқа жүйрік болу керек. Дегенмен әлеуметтің әле­уетін арттыру үшін экономикамен қатар әлеу­меттік, қоғамдық-саяси жағынан да тәжіри­бенің болғаны дұрыс.

Кент әкімі болуға үш үміткердің өмір жолы мен сайлауалды бағдарламасы газеті­міздің өткен санында жарияланды. Әр үміт­кер­дің өзіндік ұстанымдары бар. Сол ұстаным­дары бойынша тереңөзектіктердің әл-ауқатын арт­тыру бағытындағы сайлауалды бағдар­ламасын түсіндіру үшін ақпан айының 10 мен 18 аралығында үгіт-насихат жұмыстары жүргізілді. Біздің байқағанымыз, үгіт-насихат жұмыстарында үш үміткердің арасында Е.Бах­тияров белсенді болды. Ол «Есіктен-есікке» акциясы аясында кент тұрғындарының үйле­ріне арнайы барып насихат жұмыстарын жүр­гізді. Оған қоса әр сала өкілдері және кент тұр­ғындарымен кездесіп, сайлауалды бағдар­ла­масымен таныс­тырды. Ал Б.Сәрсенов пен И.Мақаштың ха­лық­пен кездесіп, сайлауалды бағдарламасын таныс­тырғанын байқамадық. Мұның өзі халық таңдауына кері әсер ететіні белгілі.

Осы тұста кент әкімі болған Нұржан Бисембаев ауқымды жобаларды жүзеге асырып, Тереңөзектің дамуына өзіндік үлес қоса білді. Осындай еңбегіне халықтың айтар алғысы мол. Алдағы қызметіне біз де сәттілік тілейміз.

Жалпы кент әкіміне жүктелер жауапкер­шілік жоғары. Сондықтан аудан орталығын көркей­туге қызмет ететін лауазымды тұлғаны сайлап алу құқығы тұрғын­дар еркінде. Бұл істе де тереңөзектіктер жауаптылық таныту қажет.

Е.БЕРКІНБАЕВ