Өзін Қоғалыкөл ауылының тұр­ғыны деп таныстырған жас жігіт жеке кәсіппен айналысатынын айтты. Айналысып отыр­ған кәсібі туралы айтып бергенде «ішімнен бәрекелді» деп қуанып қалдым. Осылайша, мен діттеген жеріме жетіп, жолай түсіп қалдым.

Елімізде кәсіпкерлікпен айна­лысуға мүмкіндік мол екені белгілі. Сол себепті де өз шаруасымен айналысып жүрген қоға­лыкөлдік жас кәсіпкердің жұмысын насихаттауды жөн көрдім. Содан Қоғалыкөл ауылдық әкімдігі арқылы жас жі­гітпен байланысқа шықтым.

Жұмыс жоқ деп масыл болған­ша қолдан келетін кәсіппен айналысу табысқа жетелейді. Кәсіптің көзін тапқан Жәнібек Алтынбеков осыған мысал бола алады. Ол ерекше кісіпке ден қойған. Мұндай кәсіп ауыл тұрмақ ауданда жоқ әлі. «Ветеринариялық қызмет көр­сету орталығын ашу» жобасы арқылы кәсібін дөңгелетіп отыр.

Ж.Алтынбеков – Қоғалыкөл ауылындағы Сабырбек Құрманбаев пен Бакарам Тамабаеваның тұла бойы тұңғышы. Отбасында өзінен кейін інісі Әлібек бар. Ауылдың құмында асыр салып ойнаған жас жігіт болашақта кәсіпкер боламын деп те ойламаған. №44 орта мектептен білім алған ол тоғызыншы сыныпты бітіргеннен кейін Қызылорда қалалық жоғары медициналық колледжінде білім алады. Колледжді тіс дәрігері ма­мандығы бойынша тәмамдаған бо­лашақ кәсіпкер аудандық емханада жастар практикасымен жұ­мыс жасағанын да жасырмады. Бірақ білімі жоғары болмаған соң жұмыс табуда қиынға соғарын біліп, өзіне қыр-сыры мәлім мал бордақылаумен айналысуды жөн көрген.

– Біз кішкентай кезімізден мал бағумен айналысып келеміз. Бала күнімізде үйде уақ мал ұстайтынбыз. Кейін уақ малдың басын көбейткен соң оларды сатып орнына ірі қара алдық. Оларды өсіріп бағып, семіртіп со­йып сатып, ақшасына базардан тай алып бағып осылай кішігірім кәсіппен айналыстық. Адам бірден кәсіп бас­тап кәсіпкер болып кетпейді. Бұл жолда маған үлкендердің қолдауы көп болды. Бірі кәсіптің көзін үйретсе, енді бірі жаңа іске баулыды. Сол кісілерге алғысымды айтамын, – дейді Жәнібек Сабыр­бекұлы.

Жас кәсіпкер 2017 жылдан бас­­тап мал бор­дақылаумен айналысып келеді. Осы кәсібін әрі қарай жандандыру үшін өткен жылы «Бизнес бастау» жобасы аясында мемлекеттен 583400 теңге көлемінде грант ұтып алып, кәсі­бін кеңейте түскен. Ол өзінің із­денім­паздығының арқасында 2021 жылдың қыр­күйек айында тағы бір жас кәсіпкерлерді қолдау, кіші кәсіпкерлікті дамыту және өндірісті арттыру мақсатында жасалған инновациялық жобаға қатысып, онда ұсынған жобасы бірауыздан ма­құлданады. Жобаның қаржыландырылуы 2-5 миллион аралығында болған. «Ве­теринариялық қызмет көр­сету ор­талығын ашу» және өз қара­жатынан ве­теринариялық дә­рі­хана ашу жобасымен өзі білетін салаға ден қойған. Аталған жоба комиссия мүшелерінің көңілінен шығып, қолдауға ие болады. Талабы таудай жігіттің жобасына 3 млн 400 мың теңге көле­мінде қаржы бөлініп, өзі 340 мың теңге қосымша қаражат қосып, жұмысқа білек сыбанып кірісіп кетеді.

– Негізінен, менің мамандығым – тіс дәрігері. Інім Әлібек Алтынбековтің мамандығы – мал дәрігері. Бұл жо­баға қатыс­пас бұрын ініміз екеуміз үлкендер­мен көп ақылдасып, бірігіп жұ­мыс жасаудың кілтін таптық. Әуе­лі інім екеуміз есік алдына кәсіпкерлік мақсаттағы екі бөлмелі нысан сал­дық. Оның ішін қажетті саймандарымен жабдықтап, жан-жануарлар дәріханасын ашуға дайындадық. Ауылда барлығының қорасында дерлік мал бар. Ірілі-ұсақты мал бағумен айналысатын ауыл хал­қына енді аудан, облыс орталық­тарына барып малға қажетті дәрі-дәрмек түрлерін алудың еш қажеті жоқ. Керекті дәрілер біз­дің ветеринарлық дәріхананың сөре­лерінен табылады. Онымен қоса, қазір жоба аясында ультрадыбыстық зерттеу және рентген аппараттары мен қажетті құрал-саймандарымды алып жұ­мыс жасаудамыз. Аппараттарды көршілес Қытай елі­нен арнайы алдырдық. Ауылда бұрын-соңды мұндай аппарат болмағандықтан малдың буаз еке­нін білмей, кө­бісі ет бағытында сойылып кете­тін. Көбіне өзіміз қаралу үшін ультрадыбыстық тексеруге аудан­ға, облыс ор­талы­ғына баратынымыз белгілі. Енді сондай құрылғының жан-жануарларға арналған түрінің ауылға кел­гені көпшіліктің таңданысын тудыр­ғаны рас. Мал­дың буаз екенін білмей сойып ішінен баласы шық­қанда көбіміз «қап, әттеген-ай» деп қаламыз. Сол «қап, әттеген-айдың» алдын алу үшін осы жобаны ұсындым. Қазір ауыл халқы малды бордақыламас бұрын алдын ала буаз емес пе деп тексертіп алатын болды. Бұл қажеттіліктен туындаған жоба, – дейді жас кәсіпкер.