Кәсіптің көзін тапқан табысқа жетеді

Кез келген дағдарыстан шығудың басты жолы – кәсіпкерлік. Бұл сала дамыса, экономиканың да қарқын алары сөзсіз. Бүгінде осы бағытта мемлекет тарапынан көптеген бағдарламалар жүзеге асырылып, өз ісімен айналысамын деушілерге демеу көп. Осындай мемлекеттік қолдаудың игілігін көріп отырған кәсіпкерлер жұмысын насихаттау үшін аудандық ішкі саясат бөлімі аудандық кәсіпкерлік, өнеркәсіп және туризм бөлімімен біріге отырып, журналистерге пресс-тур ұйымдастырды.

Алдымен, БАҚ өкілдері аудан орта­лы­ғындағы ірі сауда орталығы «Серікбол» сауда үйіне барды. Кәсіпкер, іскер әйел Мадина Омарова егемендік жылдарынан сауда-саттықпен айналысып, бұл кәсібін кеңейтіп келеді. Жа­қында ғана аудан орталығындағы үлкен ғи­маратқа көшіп, жаңа сауда үйі тұрғындарға есігін айқара ашты. «Бизнестің жол картасы 2025» бағдарламасымен екінші деңгейлі банк арқылы 20 млн теңге несие алып, сол арқылы сауда жұмысын жандандыруда. Қазіргі таң­да сауда орталығында 15 адам жұмыспен қамтылып, сапалы қызмет көрсетілуде.

Мұнан соң журналистер Ердос Бахто­разовтың құс шаруашылығы кәсібімен таныс­ты. Бүгінде жас кәсіпкерді аудан жұртшылығы жақсы таниды. Алдымен, Тереңөзек кентінен көпшілікке арнап заманауи үлгідегі монша ашты. Мемлекеттік қолдаудың игілігін кө­ріп, сол арқылы өз кәсібін жүзеге асырды. Жас кәсіпкер онымен тоқтап қалған жоқ. Өткен жылы «Құс шаруашылығы» жобасы бойынша «Бизнестің жол картасы 2025» бағ­дарламасымен 2 млн теңге грант ұтып алып, ет бағытындағы тауықтарды асырауда.

– Өткен жылдан бастап құс шаруа­шылығымен айналысып жатырмыз. Мемле­кет­тік грантты жеңіп алып, жұмырт­қадан балапан шығаратын 2 аппарат алдық. Бұл аппаратқа 1000 жұмыртқа саламыз. Жұмыртқаларды онлайн тапсырыс арқылы Грузия, Чехия мем­лекеттерінен алдырдық. «Волжанин» жұ­мырт­қаларының өзіндік ерекшеліктері бар. Одан шыққан балапандар тез жетіліп, жылдың 365 күнінде жұмыртқа береді. Ал аппараттан шыққан балапандарды сұранысқа қарай са­тып жатырмыз. Бүгінге дейін 7000-нан аса балапан сатып, пайда таптық, – дейді Ердос Мейрамбекұлы.

Жас кәсіпкер биыл тағы да басқа кә­сіп­ке бет бұруда. Жаз құрылыс мезгілі санал­ған­дықтан, құрылыс материалдарын сатуды да қолға алған. Сөйтіп, мемлекеттік қолдаудың негізінде Е.Бахторазов жан-жақты кәсіпті дамытып отыр.

Пресс-тур барысында журналистер С.Сей­фул­лин, А.Тоқ­мағамбетов ауылындағы жас кәсіпкерлер жұ­мысын да көрді. С.Сейфуллин ауылынан Абылай пен А.Тоқмағамбетов ауылынан Алмас Жахан «Еңбек» нәтижелі жұмыс­пен қамту және жаппай кәсіпкерлікті дамыту» бағдарламасы мал шаруашылығымен айна­лысуға 583,4 мың теңге грант ұтқан. Сол арқылы жылқы, ірі қара малдарын сатып алып, кәсіп­пен айналысуда.

БАҚ өкілдері Н.Ілиясов елді мекеніне де барды. Мұнда өткен жылдан омартамен айналысып жатқан Роллан Олинов кәсібімен танысты. Кәсіпкер «Микробизнес-Қызылорда» бағдарламасымен 2 млн теңге несие алып, бал өндіру жұмыстарымен айналысуда.

Жалпы, пресс-турда кәсібін енді бастап жат­қан кәсіпкерлер жұмысына мән берілді. Сол арқылы мемлекеттік бағдарламалар шең­берінде барлық мүмкіндікті пайдалануға болатыны көрсетілді. Кәсіпкерлер тек кәсіптің көзін тауып, нақты жоспарлар құру арқылы табысқа жетуге болатынын айтады.

Ердос БЕРКІНБАЕВ