Тіршілік тынысы Сырдария аудандық қоғамдық-саяси газет

№ 4 газет

15 қаңтар 2022 ж.

№ 3 газет

11 қаңтар 2022 ж.

№ 2 газет

08 қаңтар 2022 ж.

Жаңалықтар мұрағаты

«    Қаңтар 2022    »
ДсСсСрБсЖмСбЖс
 12
3456789
10111213141516
17181920212223
24252627282930
31 
» » Ауылдың ардақтысы

Ауылдың ардақтысы

Ауылдық ардагерлер кеңесінің төрағасы қызметі қо­ғамдық жұмыс болғанымен елдегі маңызды саяси оқиғаларға белсене атсалысуды талап етеді. Ауыл арда­гер­лерінің атынан сөз айту, пікір білдіру де оңай іс емес. Заманымыздың заңғар жазушысы Әбіш Кекілбаевтың «ағалықты алып жүру азаматтыққа сын» деп айтуының да өзіндік мәні мен мағынасы бар екен. Мұны саналы адам үл­кейгенде, ақыл тоқтатып, ақсақалдыққа ойысқанда тү­сініп, түйсінеді екен.

Қоғамдық қызметті қалтқысыз атқа­рып, халықтың ыстық ықыласына бө­лен­ген абзал азаматтың жарқын істері бүгін қолыма қалам, көңілімдегі көркем ойды ақ қағаз бетіне түсіруге түрткі болды. Осылайша, естелік жазуға кірісіп, терең ойға шомдым. Кейін жазған дүниемді өзіміз үзбей оқитын, асыға күтетін аудандық «Тір­шілік тынысы» газетіне ұсынып, ел азаматының еңбегін насихаттауға ниет қылдым. Сөйтіп, Тереңөзекке бет алып, қаламгерлердің қара шаңырағына айнал­ған редакцияға ат басын бұрдым.

Шалғай ауылдан аудан орталығына же­туге бір сағаттан аса уақыт кетеді. Жол-жөнекей тағы да ойға берілдім. Атпал аза­маттың жарқын бейнесі көз алдымнан кетпейді. Ол бір әулеттің ғана емес бүтін бір ауылдың ардақты азаматы еді. Сөзі мен ісі үйлескен жігіт аға­сының атқарған жұмыстары аудан хал­қының, әсіресе Іңкәрдария ауылының тұр­ғындарының есінде деп ойлаймын. Иә, біз сөз еткелі отырған Қуаныш Дабысов сөз бастаса шешен, іс бастаса көсем бо­латын-ды. Сол ептілігінің, тектілігінің арқа­сында емес пе, бір емес екі рет облыстық мәслихаттың депутаты атанып, облыстың дамуына айрықша үлес қосқаны...

Кейіпкеріміз Қуаныш Жұмабекұлы 1961 жылы Ұлы Отан соғысы ардагерінің отбасында дүниеге келген. Тереңөзекте балалық шағы өткен ол жастайынан белсенді, алғыр болып өсіп, адал ең­бек­пен қанаттанып, қатайды. Мектеп бі­тір­геннен кейін инженер-құрылысшы жә­не инженер-экономист атанып, қос бір­дей жоғары білімді дипломды маман атанды. Қаржыгерлік мамандықты да мең­геріп, жаңа заманның тынысын дөп бас­қан білікті де білгір азамат болды. Ал­ғашында Жамбыл гидромелиоративтік құ­рылыс институтын, кейін Қызылорда инженерлік-экономикалық институтын оқы­ды. Сондай-ақ, Мәскеу стандарттау, метрология және сертификаттау академиясын бітірді. Іргелі оқу орындарында оқып, бірнеше диплом иеленсе де Қуа­ныш Дабысов өзінің еңбек жолын қарапайым жұмысшыдан бастады. Инс­титутты бітіріп келгеннен кейін өскен ортасы Іңкәрдарияға келіп, құрылыс саласында еңбек етті. Жігерлі жас ізденісі мен еңбеккештігінің арқасында қайратты азаматқа айналып, ауылда бой көтерген ғимараттардың салынуына өзіндік үлесін қосты. Мал фермаларының да салынуында кейіпкеріміздің қолтаңбасы бар.

Ел егемендік алғаннан кейін ауыл түлегі кәсіпкерлік саласын меңгеруге ден қойды. Шағын және орта бизнестің дамуына атсалысып, «Байқоңыр Транзит» ЖШС-нің бас директоры болды. 2005 жылдан бастап «ҚазРос-мұнай», «Азия Транс Центр», «АстанаМоторс-2030», «Ас­тана Логистик» «Астана путь» «ЦентрСтрой­СнабСервис» және «Қырғи кү­зет» серіктестіктерінің құрыл­тайшысы ретінде жаңа жұмыс орындарын ашып, аталған мекемелердің жұмы­сын жүйеге келтірді. Кәсіпкерлікпен ай­на­лы­са жү­ріп облыстың әлеуметтік-эконо­мика­лық, қоғамдық-саяси дамуына үлес қо­сып, 600-ден астам адамды жұмыс­пен қамтыды. Мұның бәрі аймақтың зиялы қауым өкілдеріне белгілі деп ойлаймын. 2012 жылы Қуаныш Жұмабекұлының бас­тамасымен «Азия Транс Центр» ЖШС «Мұнай және мұнай өнімдерін сақ­тайтын, шығыстайтын қойма» терминалын іске қосты. Терминал сол жылдан бас­тап әлі күнге облыстың экономикалық әлеуетінің артуына ықпал етуде. Мұнан бөлек, жанашыр азамат Қызылорда қа­ласындағы №8, 9, 136, 144, 221 орта мек­тептерінің материалдық-техниалық база­сының жақсаруына қолдау көрсетті. Соғыс және тыл ардагерлеріне, көп балалы отбасыларға, зейнеткерлерге, мүм­кіндігі шектеулі балаларға қайырым­ды­лық қолдауларын да аяған жоқ. Ең маңыздысы, Іңкәрдария ауылынан қол үзбей, жұртшылықпен байланы­сып тұрды. Ауыл ақсақалдарының ұсы­ны­сына сәйкес елді мекеннен «Ер есі­мі – ел есінде» деген үлкен жазуы бар ме­мо­риалдық ескерткіш орнатып берді. Бұл қан майданда ел қорғаған, Отан үшін от кешкен жауынгерлердің рухына жа­салған үлкен тағзым болды. Сондай-ақ, қасиетті Мүлкілән бабамыздың мазарына барар жолға тас жол төсеуге жәрдемдесті.

Білікті басшы, іскер ұйымдастырушы 2005-2006 жылдары «Нұр Отан» партия­сының Қызылорда облыстық филиалы төрағасының орынбасары қызметін атқар­ды. Партияның облыстық филиалының Саяси кеңесі мен Саяси кеңес Бюро­сының мүшесі болды. Облыстық мәсли­хаттың 1, 2-ші шақырылым депутаты болып сайланып, сайлаушылардың үмі­тін ақтай білді. Ай­мағымызға белгілі қайраткер-тұл­ға Алмагүл Божанова еке­уі облыстық мәслихаттың депутаты ре­тін­де Сырдария ауданының дамуына үл­кен үлес қосты. Алмагүл Божанқызы әркез Қуаныш Дабысов туралы жақсы пікірлер айтып, еңбегін әділ бағалап жүреді. Бұл халықтың бағасы, ықыласы деп қабылдаймыз.

Мұнан бөлек, былтыр ардақты азамат бақилық сапарға аттанғанда «Сыр медиа» ЖШС бас директоры Аманжол Оңғарбаев: «Ол қарапайым болатын, өте қарапайым. Кейбіреулер құсап мақтануды да жаны сүймейтін. Біліп тұр­ған дү­ниесінің өзін елден бұрын жария қылуға ұмтылмайтын. Жасаған жақ­­­сылы­ғының өзін жат көзден жасырып ұс­тады-ау, жарықтық. Алғаш «Асар» партиясы құрылғанда көрін­ген, іс-әре­кетінен қырық жасында қамал ала­тын жігіт лебі байқалатын. Кейін «Нұр Отан» партиясының Қызылорда об­лыстық филиалының төрағасының орын­басары қызметін атқарып, «Нұр Отан» ХДП облыс­тық филиалының Сая­­си кеңесі және Бюросының мүшесі болғанын білеміз. 2007 жылдан бастап, Қы­зылорда облыстық мәслихатының IV-V ша­қырылымының депутаты болды. V шақырылымда бірге әріп­тес болдық. Емеу­ріннен елге болсынды ұғынатын­быз. Біреуге жамандық жасапты, біреуді ренжітіпті деген әңгіме естімедік. Оның басшылығымен «Азия Транс Центр» ЖШС «Мұнай және мұнай өнімдерін сақ­тайтын және шығыстайтын қойма» терминалы ашылды. Терминал облыстың эко­но­микалық және әлеуметтік дамуына елеулі үлесін қосты. Ерінбей еңбек етті, әділетсіздікке жаны қас еді. Ұғынысу мен түсінісуде көңіліміз көрші қонды, аға-іні, дос болдық. Туған жеріне, өзін сыйлаған һәм сайлаған ортаға жанашыр болып, жақсылық жасаудан шаршамайтын Дабысов Қуаныш Жұмабекұлының есімі біздің жадымызда сақталады» деп пікір білдірген еді. Бұл оның барша әріптестерінің атынан айтылған баға, ілтипат секілді.

Қызметте абыройлы басшы болған азаматтың еңбегі әр жылдары лайықты бағаланды. ҚР Президентінің үш мәрте «Алғыс хатымен», Партияның «Құрмет Грамотасымен», облыс әкімінің «Алғыс хаттарымен» марапатталды. «Бі­лім меценаты» атағын, Қорқыт ата атын­дағы Университетінің «Үздік түлегі» төс­белгісін иеленді. Мұнан басқа да «Қы­зылорда қаласына 190 жыл», «Жалаңтөс Баһадүр», «Бұқарбай батыр Естекұлына 200 жыл», «Слава Казахстана», «Лидер отрасли 2013 года» секілді бірқатар орден-медальдармен марапатталды. Құ­дай қосқан қосағы Гүлшат екеуі ұлды ұяға, қызды қияға қондырып, немере сүйіп, ұрпақ өрбітті, ағайын-туысқа сыйлы болды.
Ауылымыздың ардақтысы атанған аза­маттың өлшеулі өмірі былтыр қаңтар айында таусылды. Амал нешік, қимасақ та, қиналсақ та Алла ісіне көндігеміз. Бірақ артында өшпес із қалдырған азаматты ұмытпаймыз. Бүгін де сол ағалық ақ ниетімді, пікірімді жазып, ардақты азамат еңбегін қолымнан келгенше дә­ріптеуге тырыс­тым. Бұл менің ауыл ар­дагерлерінің басшысы ретіндегі парызым деп білемін.

Әбдіразақ БАЙМАНОВ,
Іңкәрдария ауылдық ардагерлер кеңесінің төрағасы,
«ҚР Тәуелсіздігіне 30 жыл»
мерекелік медалінің иегері

15 қаңтар 2022 ж. 97 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам