Сананы сериал уламасын десек...

Көрермен назарын аударып, жас­­тар арасында танымал бол­ған «Кальмар ойыны» кәріс сериалын бүгінде көпшілік біледі. қазір әлеуметтік желілерде осы сериал көп талқылануда.

Елдің аузынан түспей жүрген бұл сериалда қатыгездік, адам өмірін саудалау, қантөгіс көрсетіледі. Алай­­да, мән-мағынасына үңілер бол­сақ, өмірде болып жатқан шын­дықтар. Фильмнің мазмұны – ойында жеңген адам 38,5 млн АҚШ долларын ұтады. Сериалдың негізгі айтпақ ойы да осы жерден көрінеді.

Аталған киноның қысқаша маз­мұны мынадай. Қарызға бел­шесінен батқан адамдар ақшаға қызығып өз өмірін тәуекелге тігеді. Ойыншылар ойынның шынайылығын ес­­кермей бірден келіседі. Алайда, алғашқы ойынды ойнағаннан кейін оңай байлыққа жете алмайтындарын түсінеді. Бірінші ойыннан аман қалған қатысушылар на­разылық білдіріп, олар қайтадан өз өмірлеріне оралады. Шынайы өмірлерінің ойыннан еш айырмасы жоқ екенін түсінген қатысушылар ойынға екінші мүмкіндік алады.

Кейіпкерлерді әртүрлі жас шамасында алуының да өз себебі бар. Мысалы, кәрі шал, тапқыр жігіт, қараусыз қыз, аяғы ауыр ана, қатыгез еркек пен сауатты кәсіпкер. Яғни, бұл жерде ауыртпашылық ақ­шаға, байлыққа қарамайды. Қиын­дық ешқашан адам таңдаған емес. Сондықтан түзу жолмен, сабырмен, адалдықпен жеңе білу керек дегенге саяды.

Санасында ақша тұрған қатысу­шылар ештеңеден тайынбайды. Тіпті, ол үшін адам­гершілікті ұмы­тып, адам өлтіруге де барады. Алайда, Сон Ги Хун есімді кейіпкерді өте мейірімді етіп көрсеткен. Ме­нің ойымша, режиссер бұл кейіп­кер арқылы адамгершілік пен мейі­рімділік өмірдегі ең маңызды мәселе екенін түсіндіру және оны ұмытпау керек екенін айтқысы келеді.

Айта кететін тағы бір жайт, «Кальмар ойыны» сериялы кейіп­керлерінің киімдеріне сұраныс арт­ты. Әсіресе, спорттық киіміне сұ­раныс жоғары. Және бұл киім біздің Қазақстандық үлгіде де тігілді. «Qulan.kz» деп аталатын, отандық өнім өндірушілері кино­дағы 001 ден 456-ға дейінгі сандардың орнына қасиетті Құрандағы сөздерді жазып шығаруды қолға алды. Алайда, Құран сөзін әріппен әрлеп, сөзбен сәндеп, киімге шығаруға бол­майтындықтан, сүре нөмірі мен аят нөмірін қолданған.

Қантөгіске толы киноны жастар көруге құмартса, ата-аналардың көбі мұны құп­тамайды. Себебі, мек­теп жасындағы балалар бұл ки­ноның түп мағынасын түсінбеуі мүмкін. Жағымсыз кейіпкерлерге еліктеп, іс-әрекеттерін қайталап, өз өмірлеріне балта шабуы да ғажап емес. «Ел болам десең, экраныңды түзе» дейді қазіргі заман мақалы. Ендеше, жас жеткіншектердің телефонның ар жағынан нені үй­реніп жатқаны үнемі қадағалауда болуы керек деп ойлаймын.

Нұрай Серікбаева,

№135 А.Тоқмағамбетов атындағы орта мектептің

11-сынып оқушысы