Бұл сайлау бұрынғы сайлаудан өзгерек

Аудандық мәслихат депутаты ретінде ауыл әкімдерін сайлауға бірнеше рет қатыстық. Басқа депутаттарды қайдам, өзімнің таңдауыма ешкім ешқашан үстемдік жүргізген емес. Әрқашан ауылды басқаруға лайықты деген азаматқа дауыс бердім. Ал, енді биылғы шілде айынан бастап депутаттардан бұл өкілеттілік алынып, ауыл әкімдерін халық сайлайтын болды. Бұл Мемлекет басшысының Жолдауын жүзеге асыруға арналған басым бағыттардың бірі екені белгілі.

Президент ауыл әкімдерін сайлау мәселелері жөніндегі кеңесте алдағы сайлау науқанының еліміз үшін аса маңызды екенін атап өтті.

– Осы оқиғаны еліміздің тарихындағы айтулы белес деп айтуға болады. Негізі, бұл біз үшін стратегиялық мәні айрықша міндет. Азаматтарымыз тұңғыш рет жергілікті атқарушы биліктің басшысын тікелей сайлау мүмкіндігіне ие болмақ. Біз бұған біртіндеп, жоспарлы түрде келдік, – деді Мемлекет басшысы.

Жалпы, Қазақстан халқының 40 пайыздан астамы ауылда тұрады екен. Бұл жолғы саяси реформа ауыл тұрғындарының мүддесі мен игілігі үшін қолға алынып отыр. Сондықтан алдағы сайлау бұдан бұрын қабылданған саяси реформаларға тың серпін береді деп сенемін. Сондай-ақ тұрғындарды ел басқару және шешім қабылдау үдерісіне тартуға толықтай жол ашады.

Негізінен, әкімдер – биліктің әрбір елді мекендегі тікелей өкілі. Жұрт олардың қызметіне қарап бүкіл мемлекеттік басқару жүйесінің тиімділігін бағалайды. Қазір біздің ауданда үш ауыл әкімін сайлауға дайындық және үгіт-насихат жұмыстары ұйымдастырылуда. Сайлаудың жақын қалғанын ескеріп, ауыл тұрғындарын дұрыс таңдау жасауға шақырамын.

Ақтөре ИБРАГИМҰЛЫ,
аудандық мәслихат депутаты