– Ең алғаш ауыртпалығы зор медицина саласы бойынша қалалық емханаға қызметке ор­на­лас­қанда жүрексіндім. Оқуды жаңа бітірген жас бойжеткен үшін мыңдаған халықпен тығыз байланыс орнату оңайға соқ­пайды. Емханадағы әрбір күнімде қызмет­тің қызығы мен қиындығы қатар жүрді. Науқас балалардың дер кезінде диагнозын анықтап, тиіс­ті ем-шара қолдану үлкен сынақ болды. Алғашқы жұмыс жасаған емхана өмір мектебіне айналды. Кейіннен, отбасылық жағдайға байланыс­ты Қо­ғалыкөл ауылдық дәрігерлік амбу­латорияға қызмет­ке орналас­тым, – дейді білікті маман.
Қазіргі таңда Қоғалыкөл ауы­лындағы дәрігерлік амбулатория­да қызмет ететін ақ жүректі дәрі­­гер 2500-ден аса халықтың ден­саулы­ғына жіті қадағалау жүргі­зеді. Осы ауылға келін болып түскен Гүлмира Қапанқызы Ғани Ботабаевпен отау құрады. Ерлі-зайыптының 3 перзенті бар.
– Жолдасым Ғани жеке кәсіп­пен айналысады. Медицина саласы күр­делі болғандықтан, ол үне­мі қол­дау көрсетіп отырады. Шын мәнін­де, ауыл медицинасында бас­қа салаға қарағанда өзіндік қиын­шылық­тары бар. «Жедел-жәр­дем» қызметінде жүріп, ауыл тұрғында­рының шақыртуына барамыз. Түнгі уақытта жағдайы ауыр науқастарға көмек көрсетіп, дертін емдеуге барын саламыз. Ал күндізгі уақытта науқастарды қабылдап, жоспарлы ем қабылдауға жолдаймыз. 25 жыл уақыт ішінде қаншама тағдырдың мән-жайына қанықтық. Үнжырғамыз түспей, тек науқастың алдында кү­лімсірей қараймыз. Ауырғанға демеу, көңілі құлазығанға сырлас боламыз. Дәрігердің өмірдегі бар жетістігі – қарсы алдында отыр­ған адам­ның денсаулығындағы кінәратты анықтап, дертіне қонымды ем таға­йындау екенін айтқым келеді, – дейді ақ халатты абзал жан.
Ауыл халқының алғысын ар­қа­­лаған тәжірибелі дәрігер бірне­ше марапатқа қол жеткізген. Ту­ған же­­­ріне қызметін аямайтын ма­манға «Сырдария ауданының 90 жыл­дығы» медалінің шоқтығы биік.