«Ана» деген киелі ұғым
Мейірімді жүрегіне жылылық пен ұлылық ұялаған әйел – өмірдің мәні, тіршіліктің сәні. Нәзік жанды арулардың қоғамда, жалпы адамзаттың өмірінде алатын орны ерекше. Себебі, әйел – ең алдымен, отбасының ұйытқысы, «ана» деген киелі ұғымның иегері, жер бетіндегі сұлулықтың символы.«Бір қолымен бесікті, бір қолымен әлемді тербеткен» аналарға қандай теңеу айтсақ та артық емес. Әйелдердің отбасындағы беделі мен қоғамдағы алар орны отбасының беріктігіне де байланысты болса керек-ті. Қазіргі уақытта көптеген отбасыларында бар ауыртпашылықты арқалап жүретін ақ жаулықты аналар мен қыз-келіншектер екені рас. Әйел мен ер азамат отбасының ғана емес, қоғамның да қос қанаты. Сондықтан ер-азаматпен қабаттасып, биліктің биік бұтақтарына өрмелеп, заманның талабына сай әйелдер қауымы өмірдің әр саласында белсенділік танытып, қиындығы мол жұмыстың ауыртпалығына мойымай, түрлі салада табысты еңбек етуде. Мемлекетіміздің өсіп-өркендеуіне лайықты үлестерін қосуда. Әр әйел өзінше бір әлем. Ерекше болмыс иесі жарық дүниеде бар бақытын отбасынан, азаматы мен балаларынан іздейді. Отбасы бақытынан жылулық табады. Сондықтан әйел бақыты – қоғам айнасы.
Гүлшат Пірімбет,
Сырдария аудандық сотының бас маманы – сот отырысының хатшысы
