Ұстаздар отбасының жалғасы

– Кітапты күтіп, арасына бет­белгі қойып, сыртын қап­тап, жыр­­тылған жерін желім­деп ұқып­­ты ұстаңдар, оқу жылының со­ңында тексеріп аламын, – деп әр кітапқа жанашырлықпен қа­рай­тын кітапханашы Үміт Наурыз­баеваның сөзі №35 мектеп-ли­цейде білім алған шәкірттердің құлағына жатталып қал­ған. бі­лікті маманның мектеп қабыр­ғасында кітапханашы болып қыз­­мет атқарып келе жатқанына 20 жылдан асты.

Кітапханашы Үміт Камаладдинқызы – Те­рең­­өзек кентінің тумасы. Қазіргі таңда өзі қызмет атқаратын №35 мектеп-лицейді тәмамдағаннан соң, Алматы облысындағы Қазақ мемлекеттік қыздар педагогикалық институтына оқуға түскен. 1991 жылы «Кітапхана ісі және биб­лиография» ма­мандығын аяқтап, аудандық орталық кі­тапханаға кітапханашы болып орналасады. 1999 жылдан бастап қызмет жолын №35 Иса Тоқтыбаев атындағы мектеп-лицейде жалғастырады.

Мектептегі кітап қорына жауапты кітап­ханашының жұмысы оңай көрінгенімен, өзіне тән ауыртпашылығы бар. Кітапханашы 26 мың дана кітаптың 18600-і оқулық екенін айтады. Сол оқулықтың әрбірін оқушыларға үлестіріп, оның ұқыпты ұсталып, келесі оқушыға таза жетуін жіті қадағалайды. Оқу­шылармен байланысты үзбей пандемия кезінде электронды оқулықтар жіберіп, облыстық кітапханалармен байланыса отырып, мектептің кітап қорында жоқ әде­биеттердің электронды нұсқасын тауып беріп, оқушыладың сапалы білім алуына ықпал етіп отырған білікті маманды оқушылар құрметтейді. Осы жасаған еңбектері еленіп бірнеше мәрте аудан әкімінің, аудандық білім бөлімінің «Алғыс хатымен» марапатталған.

Үміт Наурызбаева ұстаздар отбасында дүниеге келген. Әкесі Камаладдин Наурыз­баев – орыс тілі пәнінің мұғалімі болуымен қатар, бірнеше жылдар аудандық білім бөлімін басқарған ардақты тұлға. Анасы Алима Нақыпова бастауыш сынып мұғалімі болған. Апай өз естелігінде:

– Менің кітапханашы болуыма әкемнің тікелей ықпалы бар. Бала күнімде әр айлық жалақысынан міндетті түрде жаңа кітап алып беріп, тілім шыққаннан әріп танытып, маған арнап үйімізде жеке кітапхана жасап берді. Мектеп бітірер шақта әкеме кітапханашы болып, оқырманды кітап деген құндылықтың қасиетін ұғындыруға атсалысқым келетіндігін айттым. Ол кісі қолдады. Алғаш әріп танытқан Анар Ізбасарова, үлкен өмірге жол көрсеткен Зоя Тайманова сынды апайларымның да же­тістікке жету жолымда еңбегі зор, – дейді.

Үміт апайдың есімін әкесі Ресей жерінде тарихи кітапхана ашқан Надежда Крупскаяның туған күнінде дүниеге келген соң сол кісінің құрметіне қойған екен. Әкесінің ақ ниетінің арқасында Үміт апай да үлкен білім ошағында кітапханашы қызметін атқарып келеді. Білікті маман өмірлік жары Темірханмен 4 бала, 3 немере тәрбиелеп, өсірді. Үйдің үлкені Динара дәрігер болса, Айшолпан – биология пәнінің мұғалімі. Ұлы Нұрдәулет – тіс дәрігері және кіші қыздары Еркенұр – мектеп оқушысы. Ұлын ұяға, қызын қияға қондырып, одан қалды мектеп кітапханасының жұмысын ұршықтай иіріп отырған білікті маманның ең­бегі қашанда жемісті болуын тілейміз!

Жұлдызай АНШАЕВА