Ширек ғасырға жуық уақытын кітап­хана саласына арнаған Сайра Бәкірқызы атақты Әбіраш Жәмішев пен Қалтай Мұхамеджанов туған жері Шіркейлі ауы­­лында өмір есігін ашқан. Мектеп қабырғасында жүрген кезінен бас­тап қазақ әдебиеті классиктерінің шығармаларын оқуға қызығушылығы артып, руханиятқа сусындап өседі. Соның нәтижесінде, ол Жезқазған мәдениет училищесін кітапхана тану және библиография мамандығы бойынша бітеріп шығады.

– Кітап – жансыз болғанымен рухани бағыт-бағдар берер ерекше құндылық. Ал кітапханашы – өмір сүру дағдыма айналған мамандығым. «Адамды адам еткен – кітап, адамзат еткен – кітапхана» деп абыз Әбіш Кекілбаев айтқандай, өз қызметіміз арқылы оқырманды жақсылық пен рухани құндылыққа жетелейміз. Әлем және қазақ әдебиетімен қатар, сан алуан жанрдағы шығармаларды зерделеп, көпшілікке насихаттаймыз. Оның ішінде балалар әдебиетінің маңызы зор, – дейді тәжірибелі кітапханашы.

Осыған дейін кітапхана саласының бірнеше бағыты бойынша қызмет ат­қарған Сайра Бәкірқызы РАБИС бағдар­ламасына электронды кітап пен мақала орналастыруды жетік меңгерген. Осы­­дан 4 жыл бұрын Қызылорда қаласын­дағы облыс әкімдігінің кадрлар білік­тілігін арттыру және қайта даярлау институты ұйымдастырған облыс кітап­ханашыларының арнайы оқуында білімін жетілдірген.

– Өткен жылдың қорытындысы бо­йынша жыл үздігі – «Жалын» номинация­­сымен марапатталдым. Білікті басшымыз Гүлстан Нұржакиеваның нұсқауымен кітапханашының атқарар қызметі мен негізгі міндетін меңгердік. Қырық мыңға жуық аудан халқына қызмет ететін біздерге зор жауапкершілік артылады. Оқырман сұранысын қанағаттандыру ар­қылы заман талабына сай ізденіп ке­леміз, – дейді білікті маман.