– Саумалға қай кезде де сұраныс көп. Жылдың қай мезгілі болмасын саумалды емге пайдаланатындар бар. Қымызды ашыту, оны күбіге пісу біраз уақыт алады. Дегенмен қымызға да сұраныс жеткілікті. Біраздан бері Қызылорда қаласындағы «Ақ барыс» сауда дүкеніне тұрақты түрде өткізіп тұрамын. Қазір бие су алып кетті. Көктемде қайтадан сауатын боламын, – дейді кәсібінен береке тапқан Гүлзира.

Гүлзираның тынымсыз еңбек етуінің арқасында ауылда сиыр сүтін өткізуге тілек білдірушілер оның қызметін пайдаланады. Күн сайын үй-үйді аралап, сүт жинап алып, оны қалаға апарып өткізуді кәсіпке айналдырып отырғанына бірнеше жыл болды. Бұл бір жағынан жұмыссыз отырмаудың амалы болса, екінші жағынан үйге кіріс кіргізудің көзі.

– Осы кәсіптің арқасында үйімізді жаңалап, кең үйге көштік. Балаларымыздың несібесі болар, үйімізден ағарған арылған емес. Мағжан ұлым жылқыға құмар, ат құлағында ойнайды. Жылқының күтімін жасап, шаруаға көмектеседі. Көкпар тартып, бәйгеге қатысады. Болашақта мал шаруашылығын кеңейту ойымызда бар. Мал бағу – ата-бабадан келе жатқан кәсіп емес пе? Ауылдағы шаруашылықтың көмегін де көріп келеміз. Жыл сайын беретін мал азығы мен көмір отбасымызға әжептәуір көмек болып тұр. Ел ағаларына алғысымыз шексіз, – дейді төрт баланың әкесі Дулат Сүлейменов.