Ел ағасының есімі ұмытылмайды

Жақында туып-өскен өңірден қуанышты хабар жетті. Қызылорда қаласындағы дарынды балаларға арналған «Білім-Инновация» мектебіне белгілі мемлекет және қоғам қайраткері Сейілбек Шаухаманұлының есімі беріліп,  абыз ақсақал рухына лайықты құрмет көрсетіліп жатыр екен. Жақсы жаңалық құтты болсын, ағайын!

Жаныңда жүрген жайсаң жанның қадір-қасиеті ол мәң­гілік сапарға аттанғанда бі­лінеді. Арамыздан бір дәуірдің жүгін арқалап көшкен  бел­гілі мемлекет жəне қоғам қайраткері  Сейілбек Шауха­манұлының  орны əлі күнге ойсырап тұр.  Бұл орын  ешкім, ешқашан толтыра алмайтын, тұғыры биік, еңсесі зор, ел-жұртқа жайлы, аға-ініге қадірлі орын еді.

Сейілбек Шаухаманұлы үлкен қызмет тұтқасына егемен ел тарихындағы ең қиын кезеңде келді. Елбасының Қазақ мемлекетінің қабырға­сын қалау жолындағы идеяларын қолдап, сенімді серігіне айналған Сәкең еліне жанашыр және мемлекетшіл тұлға еді.

Сейілбек Шаухаман­ұлы­ның тікелей басшылы­ғы­ның арқасында Сыр елінің мақ­танышына айналған об­лыс­тық медицина орталы­ғы­ның іргетасы қаланды, ауыл шаруашылығымен қатар өн­діріс саласының қыз­меті на­рықтық талаптарға сәйкес жүргізіле бастады. Ең бастысы, өтпелі кезеңнің қиындық­тарына қарамастан, елдің ішін­дегі оң әлеуметтік ахуал сақ­талды.

Жоқтан бар жасау, бардың берекесін асыру, өткен мен бүгіннің арасына алтын кө­пірдей дәнекер болу – тек ерекше тұлғалардың қолынан ке­летін шаруа. Ол – барша Сыр еліне өзінің ағалық сөзін өткізген, абыз ақсақалдар институтын жаңа бір деңгейге көтере біл­ген тұлға еді.

Ел бірлігін сақтап, ынты­мағына ұйытқы болған «Ар­дагерлер ұйымына» облыс­ты басқарған тұста облыс басшылығы тарапынан қол­даулар жасалды. Ардагер аға­лар ел-халықтың татулық-бірлігіне сызат түсірмей, жас ұрпақты еңбекке үндеуде талай игі істің үлгісін көрсетті.  Ел дамуы үшін аянбай қызмет еткен ел ағаларына қандай құрмет көрсетсек те артық емес.

Бір кезде әлемге әйгілі Әб­діжәміл Нұрпейісов аузы дуа­лы Сейілбек Шаухаманұлы туралы – «Тәңір сыйлаған талант» деп толғанып айтқан еді. Ең бастысы, ол төріміздің сәні мен қадірі еді, шын мә­ніндегі ауыз толтырып айтатын Ел ағасы болатын. Сыр бойындағы бірде-бір жиын, алқалы отырыс, салтанатты той, торқалы ас Сәкеңнің тө­бесі көрінбей басталмайтын. Оның келуін, келген соң баталы сөз айтуын ел кәдімгідей күтетін.

Сәкеңнің шешендігі мен даналығы тек Сыр бойы жұрт­шылығын емес, күллі қазақты тәнті етті. Ал ағамыз болса сол баяғы қалпынан, аңызға айналған қарапайым бейнесінен бір айныған емес.

Сәкеңнің жүріп өткен өмір жолындағы басқа жайттарды қозғамағанда, ол кез келген шаруаның әділ шешімін тереңнен ойластырып, халыққа болатын жағын ғана айтып отырды. Оның қоғамдағы түрлі түйткілді мәселелерге қатысты қозғаған өзекті ойлары жұртшылықтың көңілінен шығатын.

Күні кеше Сыр өңіріндегі іргелі білім ошағының бірі, «Бі­лім-Инновация» мекте­бі­не еліне сіңірген еңбегі өл­шеусіз Ел ағасының есімі беріліп, ескерткіш бюстінің орнатылғаны Сəкеңнің еңбе­гіне жасалған құрметтің бір парасы деп білем. Алда əлі талай еңбектер жазылып, ұрпаққа үлгі болатындай жұмыстар жасалары сөзсіз.

Өңірде елге өлшеусіз қыз­мет еткен, ғибратты ғұмырлары келер ұрпаққа өнеге болатын абыз ақсақалдарымызды насихаттау, жас ұрпаққа үлгі ету аясында алдағы уақытта іргелі жұмыстар жасалуы тиіс деп ойлаймын.

Асқар таудай аға, орны бөлек тұлға  енді еңселі тұғы­рынан ұрпаққа өнегелі жолды нұсқап, жастар рухын жанып тұратын болады.

«Жақсының аты, ғалым­ның хаты өлмейді». Бар ғұ­мы­рын еліне арнаған абыз ақсақал, алдыңғы буын аға­ларына ізетті, ізіне ерген іні­леріне құрметті, лауазым мен қызметін тоқтатқаннан кейін де халқына қадірі асқан, соңғы демі біткенше ат арқа­сынан түспеген, халықтың мүддесін жоғары қойған Сейіл­бек Шаухаманұлының даң­қы, азаматтық келбеті, қа­ра­пайым болмысы ел санасынан еш уақытта ұмы­тылмасы сөзсіз.

Болатбек Қуандықов,

қоғам қайраткері

syrboyi.kz