Оттегі концентраторы жеткізілді

Жұқпалы індет жұқтырған науқастарға облыс орталығынан оттегілік балондар жеткізілуде. Осы ретте аудандық ауруханада оттегі жеткізуші аппараттың жетіспеушілігі туындаған болатын. Бұл мәселе ел жанашырларының, қамқор азаматтардың демеушілігімен өз шешімін тауып келеді. Атап айтқанда, Сырдария ауданының құрметті азаматы Әріп Қожбанов отбасының атынан аудандық ауруханаға 1 дана оттегі концентраторын алып берді.

Аталған аппаратты аудандық ауруханаға Әріп Қожбановтың ұлы Азамат Қожбанов жеткізіп, медицина қызметкерлеріне тапсырды. Ә.Қожбановтың елге деген ыстық ықыласын жеткізіп, оттегі аппаратының науқастар еміне септігін тигізетінін айтты.

Өз кезегінде медицина қызметкерлері өнегелі отбасының игілікті ісіне ризашылығын білдіріп, бақ-береке тіледі.

Аудандық ауруханаға жеткізілген оттегі аппаратының құны 580 мың теңгені құрайды. Бұл медициналық құрылғы 2 науқасты емдеуге арналған.

Сырдариялықтардың емделуіне үлес қосқан жанашыр азаматтың отбасына алғыс білдіреміз!