Дәріні дұрыс пайдаланған жөн

Ауырмайтын адам жоқ. Басы ауырып, балтыры сыздаған адам ең алдымен дәрі-дәрмек іздей бастайды. Алдымен өз бетінше емделіп, оның әсері болмаған жағдайда дәрігерге көрінеді. Көбіне дәрігер аурудың жағдайына байланысты антибиотик тағайындайды. Осы ретте облыстық жастар денсаулығы орталығының маманы Гүлзат Жұмабек­қызы антибиотиктерді қалай қолдану керек деген сауалға жа­уап берді.

– Ең бастысы кез келген дәрі-дәрмектің нұсқаулығын оқып шығыңыз. Дәрі аса әсерлі нәтиже беру үшін бірнеше кеңеске назар аударыңыз. Біріншіден, антибиотиктер курсын бітір­ген­нен кейін міндетті түрде бифидо және лак­тобактериалдық курстан өтіңіз. Ол ішектің пайдалы микрофлорасын қалпына келтіріп, дисбактериоздан құтқарады. Екіншіден, антибиотикті ішімдікпен бірге қолдануға болмайды. Себебі ол жанама әсер беруі мүмкін. Сондай-ақ бауырға қосымша жүк­теме береді. Үшіншіден, антибиотик пен абсорбентті (ол мәселен, белсендірілген көмір) бірге қолдануға болмайды. Себебі ол антибиотиктің әсерін біршама төмендетіп жібереді. Төртіншіден, антибиотикті қанды сұйылтатын дәрі-дәрмекпен (мәселен, аспирин) бірге еш­уақытта пайдаланбаңыз. Бұл қан кету қаупін өсіреді. Бесіншіден, антибиотикке төзімділікті даму қаупінен сақтану мақсатында дәріні қолдану және мөлшерлеу тәртібін қатаң ұстану қажет, – дейді ол.

Иә, қай кезде де өз бетіңше емделу өте қауіпті. Міндетті түрде дәрігердің нұсқаулығын алыңыз. Өкінішке орай дәрінің бәрі пайдалы емес.

Бибісара ЖАНӘЛІ