Мемлекеттік қызметшілерінің қызметтік қағидалары

Мемлекеттік қызмет қашанда мінсіз болуы тиіс. Бір сөзбен айтқанда, билік пен қарапайым халық арасын жалғайтын алтын көпірге айналуы тиіс. Бүгінде мемлекеттік саладағы мамандардан білім-біліктілігімен қатар адамгершілік асыл қасиет пен ананың сүтімен келетін тәлім-тәрбиені де талап ететініміз анық.
Мемлекеттік қызметші қызметтік тәр­тіпті бұлжыт­пай сақтап, өзінің қызметтік міндеттерін адал, бейтарап және сапалы атқаруы тиіс. Жұмыс уақытын ұтымды және тиімді пайдаланып, мем­лекеттік қызмет көрсету сапасын арттыру бойынша тұрақты түрде шаралар қабылдап, мемлекеттік көрсетілетін қызметтердің тұтыну­шысы ретінде толығымен хал­ықтың сұранысына бағдар ұстануы керек.
Сондай-ақ қызмет бабында құқық бұзушылық пен теріс қылыққа жол бермей, іскерлік әдепті және ресми мінез-құлық қағидаларын сақтауы тиіс.
Мемлекеттік қызметшілердің сырт келбеті олардың қызметтік міндеттерін орындау кезінде мемлекеттік аппарат­тың беделін нығайтуға ықпал етеді. Іскерлік пен ұстамдылық және ұқып­тылықпен оның іскерлік талабын көрсетеді.
Мемлекеттік қызметшілер қызметтік жағдай­ларын және онымен байланыс­ты мүмкіндіктерді қоғамдық және діни бірлестіктердің, басқа да коммерциялық емес ұйымдардың мүдделеріне, оның ішінде өзінің оларға көзқарасын насихаттау үшін пайдаланбау керек. Тағы бір айта кететін жайт, мемлекеттік қыз­метшілердің қызметтен тыс уақытта жалпы қабылданған моральдық-әдеп­тілік нормаларын ұстануға, қоғамға жат мінез-құлық, қоғамдық орындарда адамның қадiр-қасиетiн және қоғамдағы адамгершілікке нұқсан келтіретін жағдайларына жол бермеуі тиіс. Яғни мемлекеттік қызметші қарапайымдылық танытып, тиісті көрсетілетін қызметтерді алу кезінде өзінің лауазымдық жағдайын пайдаланбау қажет.
Басшылар қарамағындағы қызмет­шілермен қарым-қатынас кезінде өзінің мінез-құлқымен бейта­раптықтың, әділ­дік­тің, риясыздықтың, жеке тұлғаның ар-намысы мен абыройына құр­метпен қараудың үлгісі болуға және меритократия қағидаттарын сақтауды қамтамасыз етуге, олардың қызметінің нәтижелерін бағалау, сондай-ақ көтермелеу және жазалау шараларын қолдану кезінде әділдік пен объективтілік таныту қажет.Сонымен қатар еңбекті, денсаулықты қор­ғауға, тиімді қызмет ету үшін қауіпсіз және қажетті жағдайларды жасауға, қызметшілердің ар-намысы мен қадір-қасиетін кемсітушіліктің және қол сұғушылықтың кез келген нысандарын болдырмайтын қолайлы моральдық-психологиялық ахуалды қалыптастыруға бағытталған шараларды қабылдауы керек.
Бүгінде білімге бой ұрып, ұлы ғұлама әл-Фарабидің «Тәрбиесіз берілген білім – адамзаттың қас жауы» деген ұлағатты сөзін ұмыт қалдырып барамыз. Тұла бо­йына тәрбие дарымаған дарын иесінен нағыз маман даярлау қиынға соғары хақ. Мемлекеттік қызметші біліммен қатар, жоғарыда атап айтқан жауапкершілік пен өз ісіне деген әділдік, адалдық, адамгершілік қасиеттерді қатаң ұстан­ғанда ғана елдің ертеңі нұрлы болмақ.

Ж.Сырғабаева,
Сырдария аудандық сотының бас маман-аға сот жасауылы