Сен енді менің балдызымсың

Бірде «Фариданы татардың қызы деп айта салғаным бар», – деп күлетін. Ол былай болған. Бірде Қазақстан жазушылары Ленинградқа барады. Содан тамақтанатын думанханаға (ресторан) бұлар ауқаттанып алуға барады ғой. Барса бұларды орысқа ұқсаңқырамайтын даяшы қабылдайды. Қалтай жаңағы келіншекке әрі-бері қарап отырып, өзіне шақырып алады да:

– Байқаймын, осы сен менің балдызым болып шықпасаң нетті. Анау аң-таң болып:

– Қалайша? – дейді. Қалтай:

 – Сен татардың қызысың ғой, ә?! – дейді. Анау:

– Оны қайдан білдіңіз? – дейді.

– Білмегенде ше... Енді қойнымда жатқан қатынымды білмегенде кімді білемін. Ол сенің апаң. Аты – Фарида. Сен енді менің балдызым боласың, – деп ем. Бізді іш тартып, кетер-кеткенше бар жылыжұмсағын аузымызға тосып жақсы болып қалдық, – дегені бар.

«Қалтайдың қалжыңдары» кітабынан