Тіршілік тынысы Tirshilik-tynysy.kz ақпараттық агенттігі
» » Шаруашылықта 40 жыл еңбек етті

Шаруашылықта 40 жыл еңбек етті

Атымтай атына заты сай жігіт. Мінезге бай азаматтың С.Сейфуллин атындағы шаруашылықта еңбек еткеніне биыл тура 40 жыл болыпты. Туған ауылындағы 1 май атындағы №137 орта мектептің сегізінші сыныбын бітіргеннен кейін жүрек қалауымен трактор руліне отырды. Еңбек жолын 16 жасында бастаған Атымтай шаруашылық басшыларының айтқанын екі етпей, еңбек майданына аралас­ты. Мықты механизаторлардан ақыл-кеңес ала жүріп, темір тұлпардың «құлағында» ойнауға талпынды. Өндірістен қол үзбей кешкі мектепті үздік бітірді.
Ауылда 5-6 жыл еңбек еткеннен кейін техника маманы болу үшін арнау­лы оқу орнында білім алу керек екенін ұғынды. Сөйтіп 1985 жылы Жамбыл облысының Қордай ауданындағы ауыл шаруашылық техникумының «техник-механик» мамандығының күндізгі бөлі­міне оқуға түсті. Техникадан хабары мол ынталы жас алғашында оқудан қиналғанымен, уақыт өте бәрін тез игеріп кетті. Техникумды бітіріп, механик дипломын алып, туған ауылына оралды. Мал шаруашылығында, фермада механик болды. Бірыңғай мал бордақылау кешенінің жұмысымен айналысты. Семіртілетін малдарға шөпті турап, булап беру, қыстық мал азығын дайындау Атымтай бастаған механизаторлардың мойнында болды. Қашанда жұмысына асқан жауапкершілікпен қарайтын азаматтың кезінде шаруашылықтың ет жоспарын орындауына қосқан үлесі мол. Жұмыста қабілетімен көзге түскен Атымтай шаруашылық орталығындағы шеберханаға шақырылды. Егемендіктің бастапқы жылдарында нарықтық қаты­насқа төтеп бере алмай шаруашылықтың шаруасы шатқаяқтаған кезде де механик А.Есназар сүйікті мамандығынан қол үзген емес. Бірді екі, жартыны бүтін етем деп жарғақ құлағы жастыққа тимей, уақытпен санаспай еңбек етті. Көбіне іс-сапарда жүріп, айырбаспен (бартер) жұмыс жасады. Әйтеуір шаруашылықты қиындықтан құтқару жолында аянбай еңбек етті. Қиындықтан, жауапкершіліктен қашқан жоқ. Туған ауылы үшін қолдан келгеннің бәрін жасайтын шебер механик 2006 жылы бас инженерлікке тағайындалды. 13 жылдан бері осы жауапкершілігі мол жұмыста еңбек етіп келе жатқандықтан Атымтай Есназар өз ісінің білгір маманы атанды. Биыл шаруашылық егіннен мол өнім алды. 1 мың гектар күріш алқабының әр гектарынан 65 центнерден өнім жинады. Науқанға техника толық қатысып, жұмыста үзіліс болған жоқ. Атымтай бастаған механизаторлар ерен еңбектің үлгісін көрсетті.
Аудан орталығында өткен «Алтын дән» мерекесінде А.Есназардың 40 жылғы қажырлы еңбегі ескеріліп, жаңа «Нива» көлігі сыйлыққа берілді. Еңбекқор азаматқа лайықты құрмет көрсетілді.
Атымтай өнегелі отбасының басшысы. Зайыбы Мира – көп жылдан бері аудандық ауруханада медбике болып қызмет атқарады. Ұлы Әділ – мұнайшы. «ҚазПетролеумгрупта» оператор. Оның келіншегі Сандуғаш та аудандық ауруханада медбике. Жастар ата-анасына немере сүйгізіп отыр. Үй іші немеренің шат күлкісіне бөленген Атымтайдың отбасы осындай еңбектен бақытын тапқан жандар.

Шаһарбек НҰРСЕЙІТОВ

26 қазан 2019 ж. 602 0