Ұлттық банктің базалық ставканы көтеруі тиімсіз - депутат

Бүгін Мәжілісте депутат Аманжан Жамалов Ұлттық банктің базалық ставканы 16%-ға көтергенін айтты, деп хабарлайды Egemen.kz.

«Ұлттық банк базалық мөлшерлемені 16%-ға дейін көтерді. Бұл өсім несие бойынша мөлшерлеменің автоматты түрде көтерілетінін және олардың бизнес үшін одан сайын қолжетімсіз болатынын білдіреді. 2023 жылы мемлекеттік қарызға қызмет көрсетуге Қазақстанның бүкіл тарихындағы рекордтық 1,8 триллион теңге жоспарланған. Ал банктер өздерінің көп триллион долларлық өтімділігін Ұлттық банктің ноталарына ыңғайлы орналастырып, жылдық 16% пайда табады. Депозиті барлар сияқты», деді Аманжан Жамалов Мәжілістің жалпы отырысында.

Оның айтуынша, Ұлттық банк пен Үкімет бағаны ұстап тұрудың екі пайдасыз тәсілінің айналасында жүр. Бұл базалық мөлшерлеме және «айналдыру схемасы».

«Байлар байып жатыр, ал кедейлер бағаның өсуіне байланысты кедейлене береді. Ұлттық банк баспасөз хабарламаларында бұл өсімнің әсері бір жылдан екі жылға дейін кешігетіні айтылады. Іс жүзінде ол алдағы екі жылда базалық мөлшерлеменің көтерілуі ағымдағы инфляцияның төмендеуіне әсер етпейді», деп атап өтті депутат.