Тоқшылық тойы
Сыр салысын төкпей-шашпай жинап алған сырдариялық диқандар биылғы жылы мерейі тасып, облыста чемпион атанды. Биыл сырдариялық шаруалар 20728 гектар жерге негізгі дақыл күріш егіп, орта өнім 64 центнерден айналды. Осы күні қамбаға 1 326 592 центнер астық құйылды. «Үздік аудан» атанған сырдариялықтар қол жеткізген жетістігі – алынған мол өнім. Бұл – ала жаздайғы төгілген тердің қайтарымы.Аудан орталығында Республика күні қарсаңында өткен «Алтын дән» мерекесі жәрмеңкемен басталды. Тоқшылық тойын аудан әкімі аралап, алдымен Орталық алаңдағы қолөнершілердің туындыларымен танысты. Содан соң жәрмеңкені аралап, шаруалармен тілдесті.
Таңалакеуімнен аудан, кент тұрғындары асыққан жәрмеңкеге ауыл шаруашылығы өнімдерінің көптеген түрі әкелінді. Үздік аудан еңбеккерлері жәрмеңкеде өнімдерін нарық бағасынан арзан сатылымға шығарды. Кенттегі А.Құнанбаев пен А.Әлиакбаров көшесінің бойында өткен жәрмеңкеге келушілердің де қатары қалың болды.
– Қамбаны астыққа толтырған дала ерлерінің жыл сайынғы сабантой мерекесі таң атқаннан басталды. Жәрмеңкеге аудан елді мекендерінен келген көліктердің қарасы көп. Жүк көліктеріне тиелген жем-шөп, ет-сүт өнімдері, азық-түліктің көптеген түрі аудан тұрғындарына нарық бағасынан арзан сатылды. Күрішке деген сұраныс жоғары болды. Жаңа астықты қаппен тасығандар келер жылдың азығын молынан алып үлгерді. Сонымен қатар, көкөніс, бақша дақылдары да жәрмеңкенің сәнін кіргізді, – дейді аудандық ауыл шаруашылығы бөлімінің басшысы Нұрбол Жұмабеков.– Ауыл шаруашылығы өнімдерінің жәрмеңкесі өтеді дегеннен алдын ала хабардар болып ертерек келдік. Қыс қамымен жыл сайын қажетті өнімдерді осы жәрмеңкеден аламыз. Қаппен күріш, картоп, жуа, сәбіз алдық. Асқабақ, қауын-қарбызды да сатып алдық. Молшылық мерекесінде берекесі тасыған сырдариялық диқандарға айтар алғысымыз мол. Қазір азық-түліктің бағасы қымбат. Сондықтан осындай ізгі іс-шаралар жиі ұйымдастырыла берсін деген тілегім бар, – дейді кент тұрғыны Г.Асқарова.
Айту керек, тоқшылық тойына аудан шаруалары 55 көлікпен 190 тонна өнім әкелді. Жалпы, 22 млн теңгені құрайтын 34 түрлі өнім тұрғындарға нарық бағасынан арзан ұсынылды.
Бибісара ЖАНӘЛІ
