Индонезияда жанартаудың атқылауынан кейін болған цунамиден қаза тапқандардың саны артып, 168-ге жетті.
750-дей тұрғын жарақат алды. 30 адам із-түзсіз жоғалып кеткен. Жүздеген үй мен ғимарат қираған. Апат аймағында іздестіру-құтқару жұмыстары жүріп жатыр. Әзірге Зонд бұғазы жағалауында цунамидің тууына не себеп болғаны нақты белгісіз. Бірақ мамандар Анак-Кракатау жанартауының атқылауынан теңіз астындағы көшкін жүрген деген пікірде.
Айта кетейік, Зонд бұғазы – Ява мен Суматра аралын бөліп, Үнді мұхитын Ява теңізімен байланыстырып тұрған бұғазы.
Жергілікті тұрғын:
- Цунами кенеттен келіп соқты. Адамдар жан-жаққа қашып, толқын олардың кейбіреуін алып кеткенін өз көзіммен көрдім.
Жергілікті билік өкілі:
- Қазір аймақта іздестіру-құтақру жұмыстары жүріп жатыр. Үйінділер астынан адамдарды іздестірудеміз. Бірақ бізге қазір ауыр техника қажет. Ал ол болса әлі келген жоқ.