Мәдениет саласы – идеологияның негізгі тетігі
Мәдениет саласында қарбалас тіршілік ешқашан толастаған емес. Көпшілік мәдениет қызметкерлері тек сахнада концерт ұйымдастырып, байқаумен ғана айналысады деп ойлауы мүмкін. Алайда, бұл – қате түсінік. Құрылымдық жағынан бірнеше бағытты қамтитын аудан мәдениеті – идеологияның негізгі тетігінің бірі. Жақында аудандық мәдениет және тілдерді дамыту бөлімінің кезекті алқа мәжілісі өтті.Аудандық мәдениет және тілдерді дамыту бөлімінің басшысы Анар Қалдыбаеваның төрағалығымен өткен жиында бірқатар мәселе қаралды. Соңғы күндері орын алған кадрлық өзгерістер де таныстырылды. Атап айтқанда, аудандық орталықтандырылған кітапханалар жүйесінің директоры қызметіне Рүстембек Байділдаев, ал Қоғалыкөл ауылдық клубының меңгерушісі болып Елдос Жаппасбаев тағайындалды.
Жалпы алғанда, алқа мәжілісінің күн тәртібіне үш мәселе енгізілді. Алғашқы болып баяндама жасаған Сырдария аудандық мәдениет үйінің директоры Жасұлан Жәрменов облыс әкімінің орынбасары М.Шермағанбеттің тапсырмасымен аудан мәдениет үйлері мен клубтарына жүргізілген зерделеу жұмыстарының қорытындысын жариялады. Екінші мәселе бойынша аудандық мәдениет үйлері мен клубтарының 2025 жылдың 10 айында атқарған жұмыстары жөнінде аудандық мәдениет үйінің әдіскері Айләззат Сүлейменова ақпарат берді. Тереңөзек кенті клубының меңгерушісі Еркін Әбдіреев, Бесарық ауылдық мәдениет үйінің директоры Маржан Дүйсенбаева, орталықтандырылған кітапханалар жүйесінің №1 филиал кітапханашысы Ләззат Серікбаева, №2 филиал кітапханашысы Кенжегүл Бодыбаева, №12 филиал кітапханашысы Айсұлу Медеуова жыл көлемінде атқарылған жұмыстар жөнінде баяндама жасап, негізгі басым-бағытты атап өтті.
Бұл ретте, бөлім басшысы Анар Қалдыбаева сөз сөйлеп, бірқатар түйткілді мәселенің шешімін тарқатты.
– Мәдениет мекемелері – қоғамның рухани тәрбиесін қалыптастыратын маңызды орта. Халықтың мәдени іс-шараға қатысуын арттыру үшін іс-шаралардың жаңа форматын енгізу қажет. Биыл мәдениет үйлері мен клубтарда төрт мәрте зерделеу жүргізілді. Әрбір зерделеуден соң кемшіліктер сараланып, оны жою бағытында жұмыс атқарылып келеді. Әлеуметтік желі – мекеменің айнасы. Сол себепті барлық мәдени іс-шара сапалы жарияланып, халыққа толық әрі ашық ақпарат ұсынылуы тиіс. Бұл қоғамның мәдени деңгейін көтеруге және жастардың рухани-адамгершілік тәрбиесін нығайтуға әсер етеді. Кітапхана саласының жұмысына ерекше көңіл бөлуіміз қажет. Оқырман санын арттыратын тағылымды жобалардың өміршеңдігін арттырған дұрыс. Әр қызметкер өз ісіне білімін, білігін және жаңашыл идеясын қоса білсе, нәтиже де соғұрлым жоғары болады деп сенемін, – деді бөлім басшысы.
Алқа мәжілісінде мәдениет саласының бірнеше өзекті мәселесі назардан тыс қалған жоқ. Әрбір мекеме басшысына нақты міндет жүктеліп, жергілікті өнерпаздарды дайындауды күшейту қажеттігі ескертілді. Алдағы жылдың жоспарлары сараланып, жаңа меже айқындалды.
Жиын соңында жыл көлемінде елеулі еңбегімен көзге түскен бірқатар азамат марапатталды. Өз кезегінде Мәдениет саласының үздігі Сансызбай Сәдуақасұлы алқа жұмысын жоғары бағалап, әріптестеріне сәттілік тіледі.
Балтабай ОРДАБЕКОВ
