Ұлық мереке – жаңғырудың бастауы

Ұлыстың ұлы күні мере­кесі аудан көлемінде кеңінен тойлануда. Мә­селен, аудандық «Дос­тық» үйінде ұлттық ме­рекені үкіметтік емес ұйым мүшелері атап өтті. Қазақ үшін мән-мағынасы зор мерекелік басқосуға аудан әкімінің орынбасары Берік Сәрменбаев пен ­Димаш Байдушев,­ Тереңөзек кентінің әкімі Ержан Бахтияров және еңбек ардагерлері қатысты.

Өз кезегінде кездесуді ашқан аудан әкімінің орынбасары Берік Сәрменбаев ар­дагерлерді ұлық мерекемен құттықтады.

– Ұлыстың ұлы күні – Наурыз ме­рекесі – іргесі сөгілмес бірлік мерекесі. Жақсы­лықтың жаршысы, жаңа жылдың бастауы бола білген мереке әрқайсыңыздың отбасыларыңызға құт-береке әкелсін! Өт­кен жылы ауданымыз үшін табысты бол­ды. Әр жылдан тек жақсылық пен береке күтеміз. Бүгінде егін егу мау­сымы басталып жатқаны белгілі. Сондықтан диқан­дардың жұмысына да сәттілік тілейміз, – деді Б.Сәрменбаев.

Келелі кездесудің шырайын аша түс­кен қыз-келіншектер жиналған қа­уым­ға наурыз көже ұсынды. Сонымен бірге  еңбек және тыл ардагері Рақым­жан Бәйменов ақ батасын берді. Биыл сек­сеннің сеңгіріне шыққан ақсақал Сәйділда Сәдуақасов та жүрекжарды ті­легін жеткізіп, мерекеге арналған өлең оқы­ды.

– Жыл өткен сайын ұлттық мерекемізді атап өту форматы жаңарып, жаңғырып келеді. Ұлттық салт-дәстүріміз кеңінен дә­ріп­теліп, ұмыт бола бастаған әдет-ғұрпы­мызға мән бере бастадық. Бүгін талай жыл сан салада қызмет еткен ардагерлердің басын қосып отырмыз. Сіздердің еңбекте­ріңіз бен атқарған жұмыстарыңыз орасан зор. Келіп жеткен жаңа жылда әрқашан шат-шадыман көңіл-күйде болайық, – дейді аудандық ардагерлер кеңесінің төр­а­ғасы Мұса Келдібаев.

Жиынға қатысқан еңбек ардагерлері өздерінің мерекелік тілектерін жеткізді.

Балтабай ОРДАБЕКОВ